Job 38 - Papiamentu Bible 2013(PB13)

SEÑOR ta papia ku JobPromé parti dje diskurso di SEÑORDios ta reta Job pa kontestá su preguntanan

1E ora ei SEÑOR, Dios di boso antepasadonan,

a kontestá Job ku stèm

ku tabata sali riba e tormenta, ku a lanta:

2‘Ken ta esun ku ta nubla e konsepto,

ku Mi ke pa hende tin di Mi,

papiando sin konosementu?

3Bon antó, para manera hòmber

i kontestá e preguntanan akí.Preguntanan tokante mundu i laman

4Unda bo tabata,

dia Mi a basha fundeshi di mundu?

Rospondé mi no, si bo por!

5Ken a disidí kon grandi e mester tabata?

Esei abo mester sa!

Bo sa tambe ken a midi tur kos

ku sinta di midi?

6Riba kiko basenan di mundu ta ankrá,

o ken a lant'é p'el a yega te na nòk,

7miéntras streanan di mardugá tabata forma koro

i henter korte selestial tabata kanta di húbilo?

8Ken tabata wanta laman,

ora e ker a brota fo'i skochi,

9ora a bistié nubia pa paña

i lor'é den skuridat profundo,

10ora a fren'é

i ser'é na kandal;

11ora a bis'é:

“Te aki bo ta yega, no mas leu;

aki bo olanan orguyoso tin ku wanta”?Preguntanan tokante ourora, skuridat i Reino di Morto

12Nunka den bo bida bo a duna òrdu

pa ourora kibra i di dia habri,

13pa nan kohe mundu tene na su puntanan

i sakudí tur hende malbado fo'i riba dje,

14miéntras mundu ta kobra forma

manera klei ora lora un seyo riba dje;

lagando su karakterístikanan resaltá

manera dibuho riba un bistí?

15E ora ei loke pa hende malbado ta nan lus,

ta kitá for di nan

i nan ta pèrdè tur nan forsa pa hasi daño.

16Bo a yega te na e brònnan,

ku ta alimentá oséanonan,

o kana listra den tur huki i nachi

di fondo di laman?

17A mustra bo unda portanan di Reino di Morto ta,

o bo a yega di kontemplá

e portanan den e skuridat,

ku ta reina den abismo di morto?

18Bo tin un idea kon inmenso mundu ta?

Bisa Mi no, si bo ta kere ku bo sa!

19Bo ta na altura kon ta yega na e lugá,

kaminda lus ta biba,

o skuridat ta alohá,

20di manera ku bo por hiba nan nan kas,

ya ku bo konosé e kaminda wowo será?

21Bo mester por sa tòg,

bo n' nase e tempu ei kaba?

N' ta basta aña bo tin riba e mundu akí?

N' ta hende di temp'i kouchiboulo bo ta?

Preguntanan tokante shelu

22Bo a yega di drenta den depósito pa sneu,

o mira mangasinanan pa pipit'i eis,

23ku mi ta reservá pa usa den tempu malu,

den dianan di guera i bataya?

24Kon yega na e lugá,

fo'i kaminda welek ta dispersá,

o kaminda bientunan di ost ta sali

bai plama riba mundu?

25Ken ta habri un kanal den shelu

pa áwaseru kore, bira basha

i un bereda pa ronkamentu di bos pasa,

26pa por muha un tera despoblá,

un desierto bandoná;

27pa sasia set di mondi será i desolá

i laga yerba spreit riba dje?

28Akaso áwaseru tin tata?

Ken ta engendrá gotanan di serena?

29For di ken su seno eis ta nase?

Ken ta duna lus na tempu friu for di shelu,

30ora awa bira duru manera piedra,

superfisie di oséano fris?

31Bo por mara Shete Strea na kadena,

lòs kordonnan di Orion?

32Bo por dirigí streanan temporada tra'i temporada

i guia konstelashon di Kanser i di Leo?

33Bo konosé e leinan ku ta goberná shelu;

e mes reglanan ta konta tambe pa mundu?

34Bo por grita duna nubianan òrdu,

di manera ku un lawin'i awa ta bira basha riba bo?

35Bo por komandá welek pa kòrta?

Lo e kana bini i bisa bo: “Na bo òrdu!”?

36Ken ta duna e para ibis sabiduria

pa anunsiá ku awa di Nilo lo subi,

o ken ta duna gai e saber

pa pronostiká tempu?

37Ken tin basta abilidat pa konta nubia?

Ken por bòltu poronnan di awa di shelu,

38lagando stòf bira duru

i klòmp'i tera pega na otro?

Preguntanan tokante bida den mondi

39Bo ta yag riba víktima pa e leon muhé

i buska kuminda p'e yunan di leon,

40ora nan krem den nan hòl

o drumi ketu warda den mondi será?

41Ken ta proveé kuminda pa rafnan,

ora nan yunan ta grita na Dios

i kana dualu mort'i hamber?