1Rei Hiram di Tiro a manda embahadornan serka David, ku palu di seder, kapdó di piedra i karpinté, pa konstruí un palasio pa David.
2E ora ei David a komprondé ku di bèrdè mes SEÑOR tabata ker e komo rei di Israel i pa kara di su pueblo Israel SEÑOR a hasi su reinado mas famoso.
3Na Herusalèm David a kasa mas be i el a haña mas yu hòmber i muhé.
4Ata nòmber di e yu hòmbernan ku a nase na Herusalèm: Shamúa, Shobab, Natan, Salomon,
5Yibhar, Elishúa, Elpelèt,
6Noga, Nèfèg, Yafia,
7Elishama, Beèliada i Elifelèt.
8Ora e filisteonan a tende ku nan a konsagrá David rei di henter Israel, nan tur a sali bini ku tur nan trupanan pa kapturá David. Asina David a tende esei, el a sali bai kontra nan.
9Ora e filisteonan a bini i a invadí e vaye di Refaim,
10David a konsultá Dios i a puntr'É: ‘Mi por ataká nan? Bo ta entregá nan den mi man?’ I SEÑOR a kontest'é: ‘Si, ataká nan, pasobra Mi ta entregá nan den bo man.’
11David a bai Baal-Perasim i a derotá e filisteonan aya. E ora ei David a bisa: ‘Dor di mi, Dios a habri paso kontra mi enemigunan manera awa ta habri su kaminda.’ P'esei a yama e lugá ei: Baal-Perasim: SEÑOR ta habri kaminda.
12Nan mester a laga asta nan diosnan atras i David a ordená pa kima nan.
13E filisteonan a bolbe invadí e vaye.
14David a bolbe konsultá Dios i Dios a bis'é: ‘No bai derechitu riba nan, pasa den un bog rondó di nan i ataká nan dilanti di e palunan di gòm.
15Asina bo tende zonido di pia den tòp di e palunan di gòm, sali bai bringa ku nan, pasobra e ora ei Dios a bai bo dilanti pa derotá e ehérsito filisteo.’
16David a hasi loke Dios a orden'é; henter kaminda for di Guibeon te banda di Guèzèr nan a derotá e filisteonan.
17David su fama a plama den tur pais i SEÑOR a perkurá pa tur nashon haña miedu di dje.
Who We AreWhat We EelieveWhat We Do
2025 by iamachristian.org,Inc All rights reserved.
