2 Reinan 14 - Papiamentu Bible 2013(PB13)

Amasías, rei di Huda(2 Krónikanan 25:1-28)

1Amasías, yu di Yoash, a bira rei di Huda tempu Yoash, yu di Yoahaz, tabatin dos aña rei di Israel.

2Amasías tabatin bintisinku aña dia el a bira rei. El a goberná durante bintinuebe aña na Herusalèm. Su mama tabata yama Yehoadan i tabata di Herusalèm.

3Amasías a hasi loke ta bon den bista di SEÑOR, pero no manera su antepasado David. Den tur kos el a sigui ehèmpel di su tata Yoash:

4E seritunan di sakrifisio sí no a disparsé; e pueblo a sigui mata i kima bestia riba nan.

5Asina Amasías tabata sintié sigur di su reino, el a kaba ku tur e funshonarionan ku a mata su tata.

6Pero e no a mata e yunan di e burdugunan. El a tene su mes na loke ta skibí den buki di lei di Moises, kaminda SEÑOR a ordená: ‘No mata mayornan pa piká di nan yunan, ni mata yunan pa piká di nan mayornan. Solamente pa su mes piká por mata un hende.’Deuteronomio 24:16; Ezekiel 18:2-4

7Amasías ta esun tambe ku a kaba ku dies mil edomita den Vaye di Salu. Den e bataya ei el a konkistá siudat Selá i a yam'é Yokteel. E siudat tin e nòmber ei te dia djawe.

8Despues Amasías a manda mensaheronan pa bisa Yoash, rei di Israel, yu di Yoahaz i ñetu di Yehu: ‘Bon, ban midi forsa!’

9Pero Yoash, rei di Israel, a manda e siguiente kontesta pa Amasías, rei di Huda: ‘Un dia, riba serunan di Libanon, un mata di sumpiña a manda bisa un palu di seder: “Laga bo yu muhé kasa ku mi yu hòmber.” Pero animalnan feros a pasa i trapa e mata di sumpiña mata.

10Amasías, bo a derotá Edom mal derotá, pero viktoria a susha bo kabes. Keda kas gosa di bo fama. Pakiko provoká desgrasia ku lo kousa bo kaida i kaida di Huda tambe?’

11Pero Amasías no ker a tende. E ora ei Yoash, rei di Israel, a sali i na Bet-Shèmèsh den Huda, Yoash i Amasías a midi forsa.

12Israel a derotá Huda i e hendenan di Huda a hui bai kas.

13Rei Yoash di Israel a kohe rei di Huda, ku tabata yu di Yoash i ñetu di Ahazías, prezu na Bet-Shèmèsh. Yoash a bai Herusalèm i a laga basha dosshen meter di e muraya di siudat abou, for di Porta di Efraim te na Porta di Skina.

14Ademas el a bai ku tur oro i plata i tur kos di uso ku tabatin den tèmpel di SEÑOR i den e kambernan di warda tesoro ku tin na palasio. I despues di a kohe algun hende komo rehen el a bolbe Samaria.

15Sobrá historia di Yoash, tur loke el a hasi i tur su hazañanan, kon el a bringa kontra Amasías, rei di Huda, ta skibí den e buki di krónika di reinan di Israel.

16Yoash a bai sosegá i a der'é na Samaria serka e reinan di Israel. Su yu Yerobeam a siguié komo rei.

17Rei Amasías di Huda, yu di Yoash, a biba diessinku aña mas despues di morto di rei Yoash di Israel.

18Sobrá historia di Amasías ta skibí den buki di krónika di reinan di Huda.

19Na Herusalèm nan a traha un kòmplòt kontra Amasías. El a hui bai Lakish, pero nan a laga persiguié te aya i mat'é.

20Riba un waha halá pa kabai a hib'é Herusalèm, kaminda a der'é serka su antepasadonan den Siudat di David.

21Azarías tabatin solamente diesseis aña ora pueblo di Huda a skoh'é pa sigui su tata Amasías komo rei.

22E ta esun ku despues di morto di su tata a reforsá Elat i tres'é bèk bou di mando di Huda.

Yerobeam II, rei di Israel

23Yerobeam, yu di Yoash, a bira rei na Israel tempu Amasías, yu di Yoash, tabatin diessinku aña rei di Huda. Yerobeam tabatin su residensia na Samaria i el a goberná kuarentiun aña.

24Yerobeam a hasi loke ta malu den bista di SEÑOR. E no a stòp di hasi e pikánan ku Yerobeam, yu di Nebat, a pone Israel kometé.

25Ta e a bolbe konkistá henter e teritorio ku tabata pertenesé na Israel, for di e kaminda ku ta bai Hamat te na Laman Morto, manera SEÑOR, Dios di Israel, a anunsiá pa boka di su sirbidó Yonas,Yonas 1:1 yu di Amitai, e profeta for di Gat-Hahefèr.

26Pasobra SEÑOR a mira ku e israelitanan sin ningun eksepshon tabata sufri amargamente i ku ningun hende no tabata yuda nan.

27I komo SEÑOR no a disidí ainda di bari Israel for di riba mundu, El a salba Israel pa medio di Yerobeam, yu di Yoash.

28Sobrá historia di Yerobeam, tur loke el a hasi i su hazañanan, ta skibí den buki di krónika di reinan di Israel. El a bringa kontra Damasko i Hamat i asina el a konkistá pa Israel teritorionan ku ántes tabata pertenesé na Huda.

29Yerobeam a bai sosegá i a der'é serka e reinan di Israel. Su yu Zekarías a siguié komo rei.