Marko 11 - Papiamentu Bible 2013(PB13)

Hesus ta drenta Herusalèm(Mateo 21:1-11; Lukas 19:28-40; Huan 12:12-19)

1Ora Hesus ku su disipelnan a yega den bisindario di Herusalèm, banda di e siudatnan Betfage i Betania, serka di Seru di Oleifi, El a manda dos disipel bai dilanti.

2El a bisa nan: ‘Bai e pueblo boso dilanti. Asina boso yega aya, boso lo haña un yu di buriku mará ei ku nunka niun hende no a kore ariba ainda. Lòs e i tres'é aki.

3Si un hende puntra pakiko boso ta hasi asina, bis'é ku Señor mester di e buriku i ku E ta mand'é bèk umbe.’

4Ora nan a bai, nan a haña un yu di buriku mará na porta di un kas, pafó riba kaminda i nan a lòs e.

5Algun hende ku tabata ei banda a puntra nan: ‘Ta kiko esaki ta? Pakiko boso ta lòs e buriku?’

6E dos disipelnan a kontestá manera Hesus a siña nan i e hendenan a laga nan bai.

7E disipelnan a hiba e buriku pa Hesus, pone nan paña riba e buriku i Hesus a subi sinta.

8Hopi hende a habri nan paña pone abou riba kaminda, otro a pone taki yen di blachi abou, ku nan a kita den mondi.

9Tantu esnan ku tabata bai dilanti di Hesus, komo esnan ku tabata sigui su tras, tabata grita:

‘Hosana!

Bendishoná ta esun ku ta bini den nòmber di Señor!

10Bendishoná ta reino di nos tata David ku ta bini!

Hosana den altura!’

11Hesus a drenta Herusalèm i despues di a mira tur kos den tèmpel, El a bai Betania huntu ku e diesdos disipelnan, pasobra a bira lat kaba.

Hesus ta maldishoná un palu di figo(Mateo 21:18-19)

12Su manisé ora nan a bini for di Betania, Hesus a haña hamber.

13Leu aya, El a mira un palu di figo tur na blachi i El a hala mas serka pa E mira si no tabatin nada di kome na e palu. Ma ta blachi so El a haña na e palu, ya ku no tabata tempu di figo ainda.

14E ora ei Hesus a maldishoná e palu bisando: ‘Nunka mas niun hende lo haña fruta pa kome for di bo!’ Su disipelnan a tende loke El a bisa.

Tèmpel ta kas di Dios(Mateo 21:12-17; Lukas 19:45-48; Huan 2:13-22)

15Ora nan a yega Herusalèm, Hesus a bai den tèmpel i kuminsá kore ku e bendedónan i e kumpradónan ku tabata eiden. El a bòltu mesa di e kambiadónan di plaka i stul di e bendedónan di palomba

16i E no tabata pèrmití niun hende karga kos di bende dor di tèmpel.

17El a splika nan: ‘No ta skibí den Skritura ku Dios a bisa:

Mi kas lo yama kas di orashon pa tur nashon pagano?

Ma boso a hasié un kueba di bandidu.’

18E saserdotenan importante i e dòktornan di lei a tend'É i nan tabata buska un manera pa mat'É; nan tabatin miedu di djE, pasobra tur e hendenan tabata loko ku su siñansa.

19Ora a bira anochi, Hesus ku su disipelnan a bandoná e siudat.

E palu di figo a seka(Mateo 21:20-22)

20Mainta trempan, ora nan tabata pasa banda di e palu di figo, nan a mira ku e palu a para seka kompletamente.

21Pedro a kòrda kiko a pasa i el a bisa Hesus: ‘Ata…Maestro! E palu di figo ku Bo a maldishoná, a seka!’

22Hesus a bisa nan: ‘Konfia den Dios.

23Mi ta sigurá boso: ken ku bisa e seru akí: “Hisa bo mes benta den laman” i e no tin duda den su kurason ku loke e bisa ta pasa, esei lo pasa tambe!Mateo 17:20; 1 Korintionan 13:2

24P'esei Mi ta bisa boso: Tur loke boso resa pidi p'e, kere ku boso a hañ'é kaba, boso lo hañ'é tambe.

25I ora boso para resa, pordoná esun ku boso tin algu kontra dje pa asina boso Tata den shelu pordoná boso faltanan.’Sirag 28:2-5; Mateo 6:14-15

Nan ta kuestioná Hesus su outoridat(Mateo 21:23-27; Lukas 20:1-8)

27Hesus ku su disipelnan a bolbe bai Herusalèm. Miéntras Hesus tabata kana den tèmpel, e saserdotenan importante, e dòktornan di lei i e ansianonan a aserk'É

28i puntr'É: ‘Ku ki outoridat bo ta hasi e kosnan ku bo ta hasi? Ta ken a duna bo outoridat pa hasi e kosnan akí?’

29Hesus a kontestá nan: ‘Mi ta djis hasi boso ún pregunta; si boso kontest'é, Mi ta bisa boso ku ki outoridat Mi ta hasi e kosnan akí.

30Bisa Mi: Huan su outoridat pa batisá hende, ta di Dios e ta bini òf di hende?’

31Nan a konsultá ku otro bisa: ‘Si nos bisa “di Dios”, E ta puntra nos pakiko nos no a kere Huan.

32Ma bisa “di hende” antó?’ Nan tabatin miedu di e multitut, pasobra tur e hendenan tabata aseptá Huan komo un profeta.

33E ora ei nan a bisa Hesus: ‘Nos no sa.’ Hesus a kontestá nan: ‘Awèl, Mi tampoko no ta bisa boso ku ki outoridat Mi ta hasi e kosnan akí.’