Job 9 - Papiamentu Bible 2013(PB13)

Job ta kontestáJob no ta mira di ki manera e por gana su kaso kontra Dios

1E ora ei Job a tuma palabra:

2‘Ai sí, mi sa tur e kosnan ei kaba,

pero kiko un hende mester hasi awor

pa Dios deklar'é hustu?

3Kon e por pleita su kaso dilanti di djE?

Dios por hasi mil pregunta,

ku niun hende no por kontestá.

4Dios ta grandi na poder i sabiduria.

Ken por konfront'É i sali ileso?

Job no por konfrontá un Dios poderoso

5Dios ta sakudí serunan sin atvertí,

E ta basha nan abou den su rabia.

6E ta laga mundu tembla:

mundu ta lòs i tambaliá riba su fundeshi.

7E por stòp solo di bria

i por paga lus di streanan.

8E so ta span shelu

E so ta dominá poder di laman.

9T'E a krea konstelashon di strea:

Oso Mayó, Orion, Pleiades

11Si E kana pasa banda di mi,

ami lo no mir'É,

E ta slep pasa bai,

sin ku mi por ripará.

12Ken lo stòp E di kohe algu?

Ken lo puntr'É: “Kiko Bo ta hasi?”

13Dios no ta laga nada plakia su rabia,

asta Rahab i su ayudantenan mester a baha kabes p'E.No tin sentido pa Job purba proba su inosensia

14Awor, ku ki palabra ami por rospondé Dios;

ku ki argumento defendé mi mes?

15Maske kon inosente mi ta,

mi no por defendé mi mes;

E ta mi hues i ta solamente

klemensia mi por pidiÉ.

16Si mi dagfar E i E presentá,

mi n' ta kere ku lo E skucha mi stèm.

17E ta machiká mi pa un bagatèl,

E ta heridá mi kada be di nobo,

sin motibu.

18E no ta duna mi

ni chèns di hala rosea,

E ta yena mi bida ku sufrimentu.

19Si ta trata di poder,

E ta Esun di mas fuerte;

si ta trata di huisio,

ken lo por dagfar E?

20Ounke mi ta inosente

mi mes boka ta kondená mi.

Ounke mi ta sin falta,

e ta proba ku mi ta kulpabel.

21Mi ta inosente, pero no ta importá;

ya mi ta kansá di biba.

22Tantu bal! Ata loke mi ta pensa akí:

E ta kita tantu bida di hende kulpabel

komo di hende inosente.

23Ora desaster okashoná morto,

Dios ta hasi bofon di sufrimentu

di hende inosente.

Job ta atmití ku no tin niun hende pa intermediá entre e i Dios

24No ta Dios ta duna hende malbado poder riba mundu?

N' t'E ta siega wowo di huesnan

pa nan no husga imparsialmente?

Si no ta Dios ta hasi tur e kosnan akí,

ta ken ta hasi nan antó?

25Mi dianan ta kore pasa mas lihé

ku koredó den kareda

i nan no ta trese nada bon pa mi.

26Mi dianan ta kore pasa lihé,

manera barku di bela ku ta nabegá ku spit,

manera águila ku ta skuer pasa riba sabana.

27Si mi bisa:

“Mi ta bai lubidá mi keho kontra Dios,

traha un kara kontentu i bira alegre,”

28tòg mi ansha no ta duna mi ora i porta,

pasobra segun Abo mi no ta inosente.

29Maske kiko pasa, mi ta resultá kulpabel;

pakiko kansa mi kurpa por nada antó?

30Maske mi baña mi kurpa

ku e awa di mas puru

i laba mi mannan ku soda gròf,

31Abo ta bolbe benta mi

den un buraku yen di sushi

i asta mi mes paña na mi kurpa

ta sinti asko di mi.

32Dios no ta hende, manera ami;

sino lo m'a kuminsá un kaso kontra djE

i nos dos lo a bai hues.

33Mare tabatin un mediadó

pa skucha nos tur dos;

un pa intermediá den nos.

34Un pa kita bulpes di Dios

for di riba mi lomba,

ya mi miedu p'E por a disparsé.

35E ora ei sí lo mi por a papia

liber i sin temor,

pero nò, esei no ta konta pa mi.