Job 7 - Papiamentu Bible 2013(PB13)

Job ta keha serka Dios ku su eksistensia ta opresivo

1Hende no mester lucha riba mundu?

Su dianan no ta manera di obrero

ku ta kobra pa dia?

2Manera katibu ku ta anhelá un tiki sombra,

trahadó kontratá ansioso pa su pago,

3asina ami tabata obligá di biba mi bida,

luna aden luna afó,

tur anochi di nobo ku sufrimentu.

4Anochi ora mi kai riba mi kama mi ta puntra:

“Kuantu ora falta ainda pa mi lanta?”

Pero anochi ta largu

i mi ta keda bòltu,

te ora di dia habri.

5Mi kurpa ta tapá ku bichi,

sushi a forma koncha riba mi kueru,

e ta kaska i basha pus.

6Mi dianan ta pasa mas lihé

ku kartucha di hilu den man di hiladó;

nan ta yega na nan fin,

sin duna mi chèns di rekuperá.

7Kòrda o Dios,

ta solamente un rosea mi ta;

si no bini kambio,

mi wowo lo no mira felisidat mas.

8Awe bo wowo ta mira mi,

pero lo e no mira mi mas;

lo Bo buska mi,

pero lo mi no t'ei mas.

Bida ta kòrtiku i Job ke pa Dios lag'é trankil

9Manera nubia ku pokopoko ta evaporá,

hende ta muri i baha den reino di morto;

e no ta bini bèk mas.

10E no ta regresá su kas

i pronto su hendenan ta lubid'é.

11Maske kiko pasa mi no ta sera mi boka,

mi mester ekspresá e angustia di mi spiritu,

protestá ya ku mi alma ta sinti amargura.

12Pakiko Bo ta vigilá mi konstantemente?

Akaso mi ta menasá Bo

manera laman o manera mònster den dje?

13M'a kere ku kama ta duna mi konsuelo,

soño ta aliviá mi destino tristu.

14Pero ki ora!

Bo a manda soño pa tormentá mi,

vishon den anochi pa angustiá mi.

15P'esei mihó choka mi mata,

ku laga mi keda biba asina mizerablemente.

16Mi ta odia e bida akí, e ta kaba ku mi!

Duna mi un blo, mi bida ta basta kòrtiku kaba.Job ta puntra pakiko Dios ta vigil'é asina tantu

17Kiko hende ta?

Pakiko Bo ta dun'é tantu importansia,

Bo ta preokupá asina tantu p'e?

18Ta na nodi pa Bo inspekt'é mainta

i despues pon'é na prueba kada momento?

19Porfin ki dia Bo ta bira kara e otro banda,

pa mi haña maske ta un chèns di hala rosea?

20Si m'a hasi piká mes,

kuantu asina mi por a ofendé Bo,

o vigilante di hende?

Pakiko mi ta blanko di bo flechanan?

Ta un karga mi ta pa Bo?

21Di kon Bo no ke tolerá mi pikánan,

ni pordoná loke m'a hasi malu?

Tòg pronto mi ta bai sosegá den stòf,

lo Bo buska mi ku zelo,

pero lo mi no t'ei mas.’