1 Tesalonisensenan 5 - Papiamentu Bible 2013(PB13)

Keda alerta pa Señor su binida

1No ta nesesario pa mi skibi boso di e ora ni e tempu ku Señor ta bini bèk,

2pasobra boso sa mashá bon kaba ku dia di Señor ta yega manera ladron den anochi, na e momento ménos sperá.Mateo 24:43; Lukas 12:39; 2 Pedro 3:10

3Ora hende ta bisando: ‘Tur kos ta trankil i seif,’ diripiente destrukshon lo baha riba nan, manera doló di partoIsaías 13:8 ta kohe un muhé na estado, anto no tin skapatorio!

4Pero, rumannan, boso no ta biba den skuridat i e dia ku Señor ta bini lo no sorprendé boso manera un ladron.

5Pasobra boso ta yu di lus, hende ku ta biba den klaridat di dia. Nos no ta di anochi ni di skuridat!

6P'esei no laga nos drumi manera otro ta hasi, pero laga nos keda lantá i bon na tinu.

7Pasobra esnan ku ta drumi, ta drumi anochi! Anto esnan ku ta bebe burachi, ta bebe burachi anochi!

8Pero nos ku ta hende ku ta biba den klaridat, laga nos keda bon na tinu. Laga nos bisti fe i amor manera un harnas pa protegé nos i bisti e speransa riba salbashonIsaías 59:17; Sabiduria 5:17-23; Romanonan 13:12; Efesionan 6:13-17 manera un hèlmu riba nos kabes.

9Pasobra Dios no a destiná nos pa haña kastigu, pero pa risibí salbashon pa medio di nos Señor Hesu-Kristu.

10T'É a muri pa nos, pa nos por biba huntu kunÉ, sea ku nos ta na bida òf den soño di morto.

11P'esei kurashá i yuda otro krese manera boso ta hasi kaba.

Ekshortashonnan

12Rumannan, nos ke pidi boso duna esnan ku ta traha meimei di boso rekonosementu, esta boso lidernan ku ta instruí boso den asuntu di Señor.

13Boso mester apresiá i stima nan mashá hopi mes pa e trabou ku nan ta hasi. Biba na pas ku otro.

14Nos ke ekshortá boso, rumannan, pa hasi lo siguiente: koregí esnan ku ta indisipliná, kurashá esnan ku ta desanimá, yuda esnan ku ta débil i tene pasenshi ku tur hende.

15Mira pa niun hende no paga malu ku malu, pero semper buska pa hasi loke ta bon pa e otro rumannan i pa tur hende.

16Sea semper kontentu;Filipensenan 4:4

17resa kontinuamente;

18yama Dios danki bou di tur sirkunstansia, pasobra esei ta loke Dios ta deseá di boso komo hende ku ta kere den Kristu.Filipensenan 4:6; Kolosensenan 4:2-7

19No paga kandela di Spiritu Santu

20ni menospresiá profesia,

21saminá tur kos i keda ku loke ta bon,

22evitá tur sorto di kos malu.

23Ku Dios mes ku ta e Dios di pas hasi boso kompletamente santu i warda boso spiritu, alma i kurpa, sin mancha, pa binida di nos Señor Hesu-Kristu.

24Dios ku ta yama boso ta fiel i E lo kumpli.

Saludo final

25Rumannan, resa pa nos tambe.

26Kumindá tur e rumannan ku un sunchi santu.

27Mi ta enkargá boso ku outoridat di Señor pa lesa e karta akí pa tur ruman.

28Grasia di nos Señor Hesu-Kristu sea ku boso.