1SEÑOR, mi ta yama Bo; bini pronto serka mi;
skucha mi bos: Mi ta sklama na Bo!
2Mi orashon sea sensia ku ta subi bai na Bo,
mi mannan alsá un ofrenda di atardi.
3SEÑOR, pone un warda dilanti di mi boka,
un vigilante na porta di mi lepnan.
4Alehá mi kurason di tur loke ta maldat,
pa mi no drenta ku mal hende i hasi malu:
mi no ke tuma parti na bankete di malbadonan.
5Si bon hende kastigá mi i skual mi pa mi bon,
ta perfume pa kabes i mi no ta neng'é.
Ma apesar di nan maldatnan ami ta sigui resa.
6Ni maske nan huesnan ta kai plèchè fo'i baranka,
nan lo atmití ku mi palabra ta saksenu.
7Meskos ku tera, ora nan bòltu i plug e
lo ta nos wesunan, plamá dilant'i boka di graf.
8Ma mi bista, SEÑOR Dios, ta fihá riba Bo,
serka Bo mi ta skonde, no laga mi pa mi kuenta.
9Warda mi di e trampa ku nan a pone pa mi,
di e kui, armá pa hasidónan di maldat.
10Pekadó por bruha numa den su propio reda,
miéntras ami ta sigui sano i salvo.
Who We AreWhat We EelieveWhat We Do
2025 by iamachristian.org,Inc All rights reserved.
