Génesis 44 - Papiamentu Bible 2013(PB13)

E kopa di Jozef

1Despues di esei Jozef a ordená su mayordomo: ‘Yena e sakunan di e hòmbernan akí ku mes tantu trigo, ku nan por bai kuné, i pone e sèn di kada un den boka di su saku.

2Pone mi kopa di plata den boka di saku di e ruman mas chikitu, huntu ku e sèn pa su trigo.’ E mayordomo a hasi manera Jozef a bisa.

3Ora di dia a kuminsá habri nan a laga e rumannan ku nan burikunan bai.

4Nan no tabata leu for di siudat ainda, ora Jozef a bisa su mayordomo: ‘Persiguí e hòmbernan ei, i ora bo yega serka nan bisa nan: “Pakiko boso a paga bon ku malu? Pakiko boso a hòrta e kopa di plata

5ku mi shon ta bebe for di dje i ku e sa usa pa mira destino? Boso a hasi malu.” ’

6Ora e mayordomo a alkansá e rumannan, el a ripití e palabranan di Jozef.

7Pero nan a kontest'é: ‘Pakiko mi shon ta papia asina ku su sirbidónan? Hamas nos por a hasi un kos asina!

8Ata nos a bolbe for di Kanaan ku e sèn ku nos a haña den boka di nos sakunan pa duna bo bèk, kon bo por kere anto ku nos por hòrta plata òf oro for di kas di bo shon?

9Si bo haña e kopa serka un di nos, e ladron mester muri, i nos ta bira bo katibu!’

10E ora ei e mayordomo a bisa: ‘Manera boso a bisa. Esun ku mi haña e kopa serka dje ta bira mi katibu; e otronan ta sali liber.’

11Nan tur a baha nan saku rápidamente for di buriku, i kada un a habri su saku.

12E mayordomo a listra tur e sakunan, kuminsando ku e saku di esun mayó te na esun di mas chikitu, i den e saku di Benhamin el a haña e kopa.

13Di konsternashon nan a sker e pañanan na nan kurpa. Nan tur a pone nan karga riba buriku i a bai siudat bèk.

14Ora Huda i su rumannan a yega kas di Jozef, e tabata ei ainda; nan a bùig te na suela p'e.

15Jozef a bisa nan: ‘Ta kiko e kos ku boso a hasi ei? Boso no tabata sa ku un hòmber manera mi lo a deskubrí e kos ei sigur?’

16Huda a kontest'é: ‘Kiko nos bisa mi shon? Kon nos por proba nos inosensia? No tin nada na nos fabor. Dios a laga nos falta sali na kla. Ata nos aki, nos lo ta mi shon su katibu, meskos ku esun ku tabatin e kopa den su poder.’

17Pero Jozef a bisa: ‘Nada di e kos ei. Solamente esun ku tabatin e kopa den su poder ta bira mi katibu. E otronan por bai kas trankil serka nan tata.’

Huda ta boga pa Benhamin

18E ora ei Huda a aserká Jozef i a bis'é: ‘Shon, bo ta pareu di fárao, mi ta roga bo laga mi bisa algu sin pone bo rabia.

19Mi shon a puntra su sirbidónan: “Boso tata ta na bida ainda? Boso tin mas ruman?”

20I nos a kontestá ku nos tin un tata bieu i ku nos tin un ruman hopi hóben ainda. E ruman ei a nase tempu nos tata tabata grandi kaba. Tambe nos a bisa ku nos tata stim'é hopi, pasobra ta e úniko yu ku el a keda kuné di su kasá preferí; nan otro yu a muri.

21Bo no a bisa nos e ora ei, pa trese e ruman, pasobra bo ker a konos'é?

22Nos a kontestá bo ku e mucha no por bai laga su tata, pasobra si e bai laga e tata, e tata ta muri.

23Pero bo a bisa bo sirbidónan, ku si e no bini ku nos, bo no ke mira nos mas.

24Ora nos a yega kas bèk serka nos tata, bo sirbidó, nos a kont'é loke bo a bisa nos.

25P'esei ora el a bisa nos: “Bai kumpra poko trigo atrobe”,

26nos a kontestá: “Nos por bai solamente si nos ruman di mas chikitu bai ku nos; pasobra e hòmber ayá no ke mira nos, si nos ruman chikitu no ta serka nos.”

27Bo sirbidó, nos tata, a bisa nos: “Boso sa, ku mi kasá a duna mi dos yu so.

28Esun a bai i te awe mi no a mir'é mas. Mi tin sigur ku ta un bestia feros a habrak'é.

29Si boso bai ku esun akí tambe, i algu malu pas'é, lo ta boso falta ku e bieu akí ta muri di pena.”

30Bida di nos tata ta asina mará na bida di e mucha akí, ku si e mucha no bai bèk ku nos ora mi regresá,

31i nos tata no mira e yu huntu ku nos, e ta muri. Asina lo ta nos falta si nos tata bieu muri di pena.

32Mi a bisa mi tata: “Laga mi para garantia pa e mucha.” Tambe mi a bis'é: “Si mi no tres'é bèk pa bo, pa semper lo mi ta kulpabel pa ku bo.”

33P'esei mi ta roga mi shon, laga ami keda atras komo bo katibu na lugá di e mucha i laga e mucha bai bèk ku su rumannan.

34Pasobra kon lo mi por bai serka mi tata bèk si e mucha no ta huntu ku mi? Lo mi no por soportá su sufrimentu.’