Proverbionan 17 - Papiamentu Bible 2013(PB13)

1Kome pan duru i biba na pas ta bal mas

ku fiesta hopi i pleita tur ora bai.

2Un katibu kapas ta remplasá un yu hòmber ku n' ta sirbi pa nada

i heredá huntu ku e otro yu hòmbernan.

3Manera kandela ta refiná oro i plata,

asina SEÑOR ta purifiká pensamentu.

4Hende ku ta hasi maldat gusta skucha mala lenga,

un gañadó gusta tende blasfemia.

5Es ku hasi bofon di hende pober ta ofendé Kreador,

esun ku tuma gustu den desgrasia di otro hende ta haña kastigu.

6Korona di hende bieu ta nan ñetunan;

orguyo di yu, nan mayornan.

7Papia nèchi n' ta pas serka hende ku n' ta sirbi pa nada,

ménos ainda mentira ta pas serka hende di karakter noble.

8Pa hopi hende plaka bou 'i mesa ta un piedra mágiko:

tur kaminda por saka probecho for di dje.

9Es ku pordoná ofensa ta kultivá amistat,

pero es ku keda ripití nan ta kore ku su amigunan.

10Un reproche ta hasi mas impreshon riba un hende ku konosementu,

ku shen halá di sota riba un hende bobo.

11Hende ku ta kontra tur kos ta buska problema,

haña lo e hañ'é ku un funshonario ku no tin duele di dje.

12Mihó pone bo mes na peliger serka un oso ku nan a hòrta su yunan,

ku serka un bobo ku a pèrdè su sintí.

13Si hende paga bon ku malu,

maldat n' ta kita fo'i su porta.

14Kuminsá pleita ta manera traha buraku den dam;

asina ta, légumai e motibu promé ku e pleitu kuminsá.

15Saka un kulpabel liber òf kondená un inosente:

tur dos SEÑOR ta repudiá.

16Pakiko hende bobo ta bin kumpra sabiduria ku plaka den man,

siendo e ta karesé di komprondementu?

17Un amigu ta stima semper,

un ruman t'ei pa tempu di berans.

18Hende ku falta sabiduria

ta primintí di para bòrg.

19Es ku gusta pleitu, gusta piká,

es ku hunga grandi traha entrada di kas altu ta pidi pa su mes destrukshon.

20Hende kurason falsu, no ta prosperá,

es ku gusta saka mentira ta hañ'é den problema.

21Pa bo ta tata di un yu bobo ta doló so,

pa bo ta tata di un yu kabes habrí n' ta un prèt.

22Legria ta kura bo,

fèrdrit ta kaba ku bo.

23Hende ku n' tin Dios ta aseptá plaka bou 'i mesa, ketu ketu,

pa kambia rumbo di hustisia.

24Bista di hende sabí ta fihá riba sabiduria,

pero bista di hende bobo ta dualu sin tin meta.

25Un yu bobo ta un disgustu pa su tata,

pa su mama, un fèrdrit grandi.

26No ta bon pa kastigá un hende inosente,

ni pa kastigá un funshonario ku ta biba bon.

27Papia poko ta kos di hende sabí,

keda kalmu kos di hende inteligente.

28Asta un hende bobo ta parse inteligente si e keda ketu,

i sabí, tanten e no habri su boka.