Isaías 24 - Papiamentu Bible 2013(PB13)

Dios su huisio riba mundu

1Ata SEÑOR ta bini

pa destruí i bari mundu,

daña mundu su kara

i plama su habitantenan.

2E mesun suerte ta toka

tantu saserdote komo pueblo,

shon komo katibu,

señora komo kriá,

bendedó komo kumpradó,

dunadó di préstamo komo fiadó,

kobradó komo debedó.

3Mundu lo ta totalmente destrosá.

Sí, kompletamente plumá.

T'asina SEÑOR a disidí.

4Tera ta tristu i ta marchitá,

mundu ta para tisgá i marchitá,

tòpnan di mundu ta para seka.

5Hende a susha mundu,

violá leinan di Dios,

despresiá su mandamentunan

i kibra e aliansa eterno kunÉ.

6P'esei SEÑOR su maldishon ta destruí tera.

Hende mester paga pa su falta.

P'esei e kantidat di habitante di mundu ta mengua,

tiki hende so ta sobra.

7Drùifnan tin aspekto tristu,

matanan di drùif ta seka;

burachénan kontentu awor ta keha.

8Ritmo alegre di tamburein ta muri,

bochincha di parandero ta para,

arpa su tononan kontentu

ta baha te bira muda.

9N' ta kanta mas ora di bebe,

bibida a bira marga den boka.

10E siudat ta ún ruina,

káos tur kaminda,

tur porta di kas será,

niun hende no por drenta mas.

11Den kaya hende ta grita pidi biña,

tur alegria a paga,

tur kontentu a disparsé for di mundu.

12E siudat a bira ún solo ruina,

su porta ta kibrá na wèrki.

13Riba tera, den pueblonan

lo no sobra hopi hende,

mes poko ku despues di kosecha,

ora a ranka drùif

i ta delaster frutanan so falta pa piki ainda.

Alegria prematuro

14Esnan ku a sobrebibí ta entoná un kanto,

nan ta hubilá grandesa di SEÑOR;

nan ta dal gritu di entusiasmo

yegando for di paisnan den wèst.

15P'esei boso den regionnan di ost,

duna gloria na SEÑOR;

boso riba e islanan den laman

proklamá su nòmber:

SEÑOR, Dios di Israel.

16For di skinanan mas leu di mundu

nos ta tende kantamentu:

‘Gloria n'E: E ta hustu!’

Pero ami ta bisa:

‘Ai di mi, esta malora!

Esta malora!

Traidornan ta tramando traishon;

e ta ko'i tur dia.’

17Teror, trampa i reda ta warda boso,

habitantenan di mundu!

18Esun ku hui pa gritamentu di spantu

ta kai den trampa,

esun ku sali for di trampa

ta pega den reda.

Damnan di shelu ta kibra,

fundeshi di mundu ta sakudí.

19Kibra tera ta kibra,

baster e ta baster habri,

tembla tera ta tembla!

20Manera buraché e ta zeilu,

zuai bai bini manera chosa den bientu.

E ta doblá bou di karga di kulpa,

e ta kai, sin por lanta mas.

21Riba e dia desisivo ei

SEÑOR ta regla kuenta

ku podernan di universo ayariba,

ku reinan di mundu akibou.

22Lo yag nan trese huntu

tira nan den pos, sera den kashòt

i kastigá nan despues di hopi tempu.

23Luna blek ta bira kòrá di bèrgwensa,

solo radiante ta pèrdè koló pa e skandal,

pasobra SEÑOR soberano lo reina

riba seru di Sion i na Herusalèm.

Su gloria lo resplandesé

den bista dje ansianonan di pueblo.