2 Krónikanan 16 - Papiamentu Bible 2013(PB13)

Asa ta buska yudansa di Aram(1 Reinan 15:16-22)

1Den e di 36 aña di reinado di Asa, Basha, rei di Israel, a sali pa bringa kontra Huda i el a reforsá e siudat Rama pa stroba tur hende di drenta òf sali for di teritorio di Asa, rei di Huda.

2Pa e motibu ei Asa a saka plata i oro for di e kambernan di tesoro di tèmpel di SEÑOR i for di su palasio i el a manda nan pa rei Bèn-Hadad di Aram ku tabatin su residensia na Damasko. El a manda e siguiente rospondi p'e:

3‘Tin un kombenio entre ami ku bo, manera tabatin entre mi tata ku bo tata. Aki mi ta manda oro i plata pa bo. Awèl kibra e kombenio ku bo tin ku Basha, rei di Israel, pa e laga mi na pas.’

4Bèn-Hadad a bai di akuerdo ku rei Asa i el a ordená e komandantenan di su trupanan ataká e siudatnan di Israel. Asina el a konkistá Iyon, Dan, Abel-Maim i tur siudat kaminda tabata warda provishon den teritorio di Naftali.

5Na momento ku Basha a tende e notisia, el a stòp di reforsá Rama i a laga e trabou para.

6Rei Asa a yama tur hende di Huda huntu. El a laga kita e piedranan i e palunan ku rei Basha a reforsá Rama kuné i ku nan el a reforsá e siudatnan Gueba i Mispa.

7Vidente Hanani a bai serka rei Asa di Huda i bis'é: ‘Bo a buska yudansa serka rei di Aram i no serka SEÑOR, bo Dios. P'esei e ehérsito di rei di Aram no a kai den bo man.

8E hendenan di Etiopia i Libanon tambe no tabatin ehérsitonan mashá poderoso ku garoshi i kabai? Pero tòg SEÑOR a entregá nan den bo man, pasobra bo a buska yudansa serka djE.

9SEÑOR su bista ta kontinuamente riba henter mundu pa yuda ku gran poder tur hende ku ta dediká nan mes di kurason i alma n'E. Tabata un lokura di bo di a pidi Aram sosten. Djawe padilanti lo bo biba kontinuamente den guera.’

10Asa a bira razu riba e vidente i a laga ser'é den prizòn, asina rabiá e tabata riba dje. Na e okashon ei Asa a maltratá mas hende di pueblo.

Morto di Asa(1 Reinan 15:23-24)

11Historia di Asa for di antaño te den tempunan mas resien ta skibí den buki di e reinan di Huda i di Israel.

12Den e di 39 aña di su reinado su pianan a kuminsá molesti'é. Su malesa a bira hopi grave, pero tòg e no a buska yudansa serka SEÑOR, pero solamente serka dòkternan.

13Asa a bai sosegá serka su antepasadonan den e di 41 aña di su reinado.

14A der'é den su graf ku el a laga koba den Siudat di David. A pon'é riba un kama kaminda a stroi yerba i speserei ku tabata hole dushi. Ekspertonan, trahadó di perfume, a prepará nan. Despues nan a sende un kandela grandi na su honor.