Yozue 13 - Papiamentu Bible 2013(PB13)

E teritorionan ku e israelitanan mester a konkistá ainda

1Yozue tabata di edat basta altu kaba tempu ku SEÑOR a bis'é: ‘Ya bo ta basta bieu di edat, pero ainda tin mashá hopi tereno pa konkistá.

2-3Ta trata di e siguiente teritorio: e region kaminda e filisteonan i e gueshuritanan ta biba, ku ta kore for di riu Nilo, parti ost di Egipto, te den nort na siudat Ekron. E region akí ta konsiderá teritorio di Kanaan. Aya tin sinku hefe di siudat filisteo, esta di Gaza, di Ashdod, di Ashkelon, di Gad i di Ekron. I den zùit bo ta haña teritorio di e awitanan.

4Ainda tin di konkistá henter e pais di e kanaanitanan tambe: for di Ara, un siudat di e sidonitanan, te na Afèk, ke men frontera di e amoritanan.

Teritorio di tribu di Ruben

5Pa delaster tin e pais di e giblitanan i e parti ost di seru Libanon, for di Baal-Gad na pia di seru Hermon te na e kaminda pa bai Hamat.

6Segun e israelitanan yega serka, Mi ta kore ku e habitantenan di Sidon i tur e hendenan bibá den seru, for di Libanon te Misrefot-Maim.Tribu di Ruben

15Moises a parti tereno pa tribu di Ruben segun grandura di e famianan.

16Nan teritorio tabata e region na nort di Aroer — e siudat ku ta keda kantu di riu Arnon na mitar di e vaye — henter e sabana den serkania di Medba,

17Hèshbon ku e siudatnan rondó di dje den e sabana, esta Dibon, Bamot-Baal, Bet-Baal-Meon,

18Yahas, Kedemot, Mefaat,

19Kiriataim, Sibma i Sèrèt-Hashahar ku ta riba seru den e vaye,

20Bet-Peor, bahada di Pisga i Bet-Haishimot.

21Ke men tur e siudatnan di e sabana, henter teritorio di rei Sihon di e amoritanan, ku tabatin su palasio na Hèshbon. Moises a derotá Sihon i e prínsipenan dje midianitanan ku tabata biba den e pais ei i ku tabata someté na Sihon, esta: Ewi, Rèkèm, Sur, Hur i Reba.

22Entre esnan ku e israelitanan a mata tabatin e miradó di destino Bileam, yu di Beor.

23Esaki tabata e teritorio, ku e siudat- i pueblonan, ku e famianan di tribu di Ruben a haña komo propiedat. E teritorio tabata yega te na riu Yordan parti wèst.

Teritorio di tribu di Gad

24Tambe pa tribu di Gad Moises a parti tereno segun grandura di e famianan.

25Nan a haña e region di Yazer i tur e siudatnan di Guilead ku mitar di e pais di e amonitanan te na Aroer, ku ta keda parti ost di Raba.

26E parti ei tabata kore for di Hèshbon te Ramat-Hamispè ku Betonim, i di Mahanaim te region di Lidbir.

27Tambe nan a haña un par di siudat den vaye di riu Yordan: Bet-Haram, Bet-Nimra, Sukot ku Safon, sobrá dje teritorio di rei Sihon. E parti ost dje vaye di riu Yordan te na e lago di Kinerèt tambe.

28Esaki tabata e teritorio ku e siudat- i pueblonan ku e famianan di tribu di Gad a haña komo propiedat.

Teritorio di e mitar tribu di Manase

29Moises a parti tereno pa e mitar tribu di Manase tambe, segun grandura di e famianan ei.

30E teritorio akí tabata kore parti nort di Mahanaim. E tabata kubri henter Bashan, e reino kompleto di rei Og ku e sesenta pueblonan di Yair,

31mitar di Guilead i Ashtarot ku Edrei kaminda rei Og tabatin su palasio. Tur esaki tabata pa e desendientenan di Makir, yu di Manase, es desir pa mitar di e desendientenan di Makir segun grandura di nan famianan.

32Asin'ei Moises a parti e sabana di Moab, ost di Yordan, na e otro banda di Yériko.

33Tribu di Levi sí e no a duna tereno komo propiedat. Nan a haña privilegio di sirbi SEÑOR, Dios di Israel, manera SEÑOR a primintí nan.