Hoséas 14 - Papiamentu Bible 2013(PB13)

Bolbe serka SEÑOR ta habri kaminda pa un futuro nobo

1Bolbe, Israel,

bolbe serka SEÑOR, bo Dios!

Bo a trompeká pa motibu di bo pikánan,

2konfesá i bolbe serka SEÑOR.

Bis'É:

‘Pordoná nos tur maldat,

aseptá loke ta bon.

Nos no ta ofresé toro komo sakrifisio,

pero nos palabranan:

3Asiria no por salba nos,

nos lo no konfia mas riba garoshinan di guera.

E kosnan ku nos mannan a traha,

nos no ta yama mas “nos dios!”

Pasobra Bo tin duele di un wérfano.’

4SEÑOR ta bisa:

‘Lo Mi kura nan di nan asko,

lo Mi stima nan di kurason,

mi rabia a plakia.

5Lo Mi ta pa Israel manera serena,

Israel lo floresé manera un leli,

tira rais manera palunan na Libanon.

6Su stèkinan lo ekstendé;

manera un palu di oleifi,

asina bunita lo e ta,

lo e hole dushi manera e palunan di Libanon.

7Esnan ku ta biba den su sombra,

lo kultivá grano atrobe.

Nan lo floresé manera mata di wendrùif,

lo ta famoso manera biña di Libanon.

8Kiko mas Mi tin di aber ku e diosnan falsu, Efraim?

T'Ami ta Esun ku ta skuch'é

i ku ta perkurá p'e.

Mi ta manera un palu di siprès semper bèrdè;

ta Mi bo tin ku yama danki pa bo frutanan.’

Konklushon

9Es ku ta inteligente, mester paga tinu na e palabranan akí,

esun ku tin komprondementu, rekonosé nan.

Pasobra kamindanan di SEÑOR ta règt:

hende hustu ta sigui e kamindanan ei,

pero rebeldenan ta trompeká riba nan.