Huesnan 20 - Papiamentu Bible 2013(PB13)

Bataya di e israelitanan kontra tribu di Benhamin

1Despues tur israelita di Dan, na parti nort, te Beer-Shèba, na parti zùit, i tambe di pais Guilead, a sali manera ta ún solo hòmber nan tabata, pa bai reuní serka SEÑOR na Mispa.

2Na e reunion akí di e pueblo di Dios tabatin e lidernan di tur tribu di Israel tambe. En total tabatin 400.000 sòldá bon di trein.

3Tribu di Benhamin a tende ku tur e otro israelitanan a bai Mispa. E israelitanan a puntra e levita kon e krímen a keda kometé.

4El a kontestá: ‘Ami i mi konkubina a yega Guibea, ku ta pertenesé na tribu di Benhamin, pa nos pasa nochi.

5E habitantenan di Guibea a sera kabes kontra mi i anochi nan a rondoná e kas ku mal intenshon. Nan ker a mata mi i nan a violá mi konkubina di tal manera ku el a muri.

6E ora ei mi a kòrta mi konkubina na pida pida i manda e pidanan pasa rònt den tur parti di Israel. Pasobra loke tribu di Benhamin a hasi ta un echo perverso i un bèrgwensa; anto pió ainda na Israel!

7Awor israelitanan, boso tur t'aki. Duna awor boso opinion i boso konseho.’

8E ora ei henter e pueblo a lanta manera ta ún solo hòmber nan tabata i a bisa: ‘Ningun di nos no ta bai su tènt òf su kas bèk.

9Asin'akí nos ta hasi ku Guibea: Nos ta tira lòt pa wak ken ta atak'é.

10For di kada tribu di Israel nos ta saka di kada dies hòmber un, pa e sòru pa kuminda pa nos. Ora nan bini bèk, nos ta bai Guibea pa kastigá e habitantenan pa e echo perverso ku nan a kometé na Israel.’

11Asin'ei tur israelita a uni manera ta ún solo hòmber nan tabata pa tuma akshon kontra e siudat.

12Despues e tribunan di Israel a manda mensahero pa henter teritorio di tribu di Benhamin. Nan mester a puntra: ‘Ta kon bini un akto asina por a tuma lugá serka boso!

13Entregá nos e sinbèrgwensanan di Guibea, pa nos mata nan i kaba ku maldat na Israel.’ Pero tribu di Benhamin no ker a tende di e otro israelitanan.

14Al kontrario: e benhaminitanan di e otro siudatnan a reuní na Guibea, pa nan bringa kontra e otro israelitanan.

15Segun konteo di e dia ei, e benhaminitanan di e otro siudatnan tabata konsistí di 26.000 sòldá, ku tabata bon di trein, sin konta e 700 sòldánan ku eksperensia di Guibea mes.

16Den e ehérsito ei tambe tabatin 700 sòldá slengu; nan no tabata sa kiko ke men faya ora nan zuai un piedra.

17E otro israelitanan tambe a tene un konteo. Nan tabata 400.000 sòldá ku eksperensia.

18E israelitanan a sali bai Betel, kaminda nan a konsultá Dios. Nan a puntr'É: ‘Kua tribu mester bai dilanti, ora nos ataká tribu di Benhamin?’ SEÑOR a kontestá: ‘Tribu di Huda.’

19E ora ei e israelitanan a sali mainta bai Guibea kaminda nan a lanta nan kampamentu.

20Despues nan a bai pa bringa kontra tribu di Benhamin. Nan a para kla pa ataká Guibea.

21Pero e benhaminitanan a sali for di Guibea i nan a derotá 22.000 israelita e dia ei.

22-24P'esei e israelitanan a bai Betel pa nan yora dilanti di SEÑOR, te ora a bira nochi. Aya nan a puntra SEÑOR si nan mester bolbe ataká nan rumannan, tribu di Benhamin. Komo SEÑOR a duna nan òrdu pa ataká, nan a haña brio i riba e di dos dia nan a bai e mes kaminda ku nan a bai e dia promé, pa nan prepará nan atake.

25E dia ei e benhaminitanan a bolbe sali for di Guibea bai topa nan. E bia akí nan a derotá 18.000 sòldá di Israel. Tur tabata sòldá bon di trein.

26E ora ei tur israelita, henter pueblo di Israel, a bai Betel. Aya, dilanti di SEÑOR, nan a sinta yora i a yuna te anochi. Tambe nan a ofresé sakrifisio di kandela i di pas pa SEÑOR.

27-28Den e tempu ei e arka di aliansa di SEÑOR tabata na Betel, i Pinhas, yu di Eleazar i ñetu di Aaron, tabata saserdote. E israelitanan a puntra SEÑOR: ‘Nos tin ku bolbe ataká tribu di Benhamin, nos rumannan; òf nos tin ku stòp?’ SEÑOR a kontestá: ‘Ataká nan, pasobra mañan Mi ta entregá nan den boso poder.’

29E ora ei e israelitanan a laga un grupo di sòldá skonde rònt di Guibea.

30Riba e di tres dia ei e israelitanan a sali pa bai bringa kontra Benhamin i meskos ku e bianan anterior, nan a prepará pa ataká Guibea.

31Tribu di Benhamin a sali pa topa e israelitanan i a bai muchu leu for di e siudat. Meskos ku e bianan anterior tribu di Benhamin a kuminsá mata sòldá di e otro partido. Nan a mata mas o ménos trinta hòmber riba e kamindanan di Betel i Guibea, i den e kunukunan.

32E benhaminitanan a pensa ku nan a derotá e israelitanan, meskos ku nan a hasi e bianan anterior. Pero e israelitanan ya a palabrá ku nan ta hui pa lòk tribu di Benhamin hiba te riba e kamindanan, leu for di e siudat.

33P'esei e israelitanan a hasi manera ta hui nan tabata hui i nan a bai Baal-Tamar, miéntras e grupo ku a skonde, a sali for di kaminda nan tabata, esta e kunuku di Gueba

34i a ataká Guibea. Nan tabata 10.000 sòldá ku eksperensia. E bataya tabata pisá, pero e benhaminitanan no tabata sa ki desgrasia tabata warda nan.

35SEÑOR a laga tribu di Benhamin pèrdè kontra e israelitanan. E israelitanan a derotá 25.100 hòmber di tribu di Benhamin, kada un tabata sòldá bon di trein.

36E ora ei tribu di Benhamin a komprondé ku nan a pèrdè e bataya. Pa e israelitanan a logra e viktoria akí, nan a konfia riba e hòmbernan ku tabata skondí rònt di Guibea. P'esei nan a gaña hui,

37miéntras esnan ku a skonde a ataká Guibea rápidamente, konkistá e siudat i mata tur habitante.

38Nan a palabrá ku esnan ku a skonde, pa esakinan laga un huma diki sali for di e siudat.

39Ora e israelitanan ku tabata den bataya a gaña hui, tribu di Benhamin a mata trinta hòmber. Miéntras nan tabata pensa kaba ku nan a gana e bataya, meskos ku e bianan anterior,

40huma, e señal, a kuminsá sali for di e siudat. E benhaminitanan a drei wak i nan a spanta, ora nan a mira vlandam di kandela ta sali for di henter e siudat bai laria.

41Ora e israelitanan a bira bèk, tribu di Benhamin a drenta pániko, pasobra nan a mira nan desgrasia kla kla nan dilanti.

42Nan a hui pa e israelitanan i bai den direkshon di desierto. Pero nan no por a skapa, pasobra e israelitanan ku tabata bini for di direkshon di e siudatnan a ataká nan i mata nan.

43E israelitanan a changa tribu di Benhamin, keda persiguí nan i bati nan manda te parti ost di Guibea.

44Diesocho mil benhaminita a muri den e bataya; kada un tabata un bon sòldá.

45E sobránan a hui bai den direkshon di seru di Rimon, den desierto. Miéntras nan tabata na kaminda e israelitanan a mata 5000 hòmber mas. Despues nan a persiguí e benhaminitanan i a mata 2000 mas.

46Riba e dia ei a muri en total 25.000 benhaminita, kada un tabata un bon sòldá.

47Di e benhaminitanan ku a hui, 600 so a logra yega e seru di Rimon den desierto, kaminda nan a keda kuater luna.

48Ma e israelitanan a bira bai bèk kaminda tribu di Benhamin tabata. Nan a mata tur hende i tur bestia ku nan a topa. Tambe nan a pega tur siudat den e region ei na kandela.