2 Krónikanan 19 - Papiamentu Bible 2013(PB13)

1Ora rei Yoshafat di Huda a bolbe su palasio na Herusalèm sano i salvo,

2vidente Yehu, yu di Hanani, a bai top'é i bis'é: ‘Kon bo por yuda un enemigu di Dios i tin amistat ku hende ku tin rabia riba SEÑOR? P'esei SEÑOR ta rabiá ku bo.

3Tòg bo a hasi algu bon tambe; bo a kita e palunan sagrado for di den pais i asina bo ta purba hasi boluntat di Dios sinseramente.’

Yoshafat ta nombra e huesnan

4For di e dia ei Yoshafat a keda na su pòst na Herusalèm. Sí el a biaha rònt e pais di Beer-Shèba na zùit te e serunan di Efraim na nort, pa trese e pueblo atrobe serka SEÑOR, Dios di nan antepasadonan.

5Den tur e siudatnan reforsá di Huda, el a nombra hues.

6El a bisa nan lo siguiente: ‘Realisá ki tarea boso ta tuma riba boso, pasobra boso no ta hasi hustisia den nòmber di hende, pero den nòmber di SEÑOR; E ta serka boso ora boso ta dikta sentensia.

7Respetá SEÑOR, nos Dios, i traha korektamente, pasobra E no ta tolerá pa boso trose lei ni ta partidario ni korupto.’

8Na Herusalèm tambe Yoshafat a nombra algun levita, saserdote i kabes di famia komo hues. Nan tabata atendé asuntunan religioso i konfliktonan entre habitantenan di Herusalèm.

9El a duna nan e siguiente òrdu: ‘Respetá SEÑOR, i hasi boso trabou ku dedikashon i segun boso konsenshi.

10Den tur kaso ku boso rumannan, huesnan di den siudat, presentá boso, sea ta trata asesinato òf matamentu, òf splikashon di lei ku su mandamentunan, su instrukshonnan òf su dekretonan, boso mester konsehá nan seriamente, pa nan no bira kulpabel den bista di Dios. Si boso no trata asina, boso tambe lo ta kulpabel i Dios lo rabia ku boso meskos ku lo E rabia ku nan.

11Gransaserdote Amarías lo atendé tur asuntu religioso i Zebadías, yu di Yishmael i kabes di tribu di Huda, lo atendé tur asuntu sivil i militar. E levitanan lo yuda boso komo funshonario. Sea disididu, pasobra SEÑOR ta ku esnan ku ta hasi bondat.’