Salmo 4 - Papiamentu Bible 2013(PB13)

SALMO 4Serka SEÑOR mi bida ta fo'i peligerPa maestro di kanto. Ku instrumèntnan di kuèrdè. Salmo di David.

1Si mi yama Bo, kontestá mi, o Dios,

ku semper a trata mi ku hustisia,

ku den pèrtá ta duna mi rosea;

tene piedat di mi, skucha mi orashon.

2Shonnan, kuantu tempu mas

boso lo sigui rebahá mi honor,

kana tras di kosnan sin balor

i buska solamente engaño?

3Kòrda ku SEÑOR a reservá

su fiel amigu pa E mes;

SEÑOR ta skucha, ora mi yam'É.

4Tembla, no hasi piká,

reflekshoná riba kama, den silensio.

5Ofresé sakrifisionan legítimo

i pone konfiansa den SEÑOR.

6Tin hopi hende ku ta bisa:

‘Ken lo trese pa nos algu di bon?’

SEÑOR, mira nos ku bon wowo!

7E alegria ku Bo a duna mi

ta mas grandi ku hamas nan lo tin

ku tur nan maishi i biña.

8Ki ora ku mi bai drumi

mi ta pega soño na pas;

pasobra, SEÑOR, Abo so

ta laga mi biba trankil.