Hoséas 11 - Papiamentu Bible 2013(PB13)

Dios su amor ta grandi

1SEÑOR ta bisa:

‘Tempu Israel tabata yòn ainda,

Mi a kuminsá stim'é

i for di Egipto Mi a yama mi yu.

2Pero mas tabata yama nan,

mas nan tabata kore pa e yamadanan:

nan tabata ofresé sakrifisio na Baalnan

i kima sensia dilanti di e imágennan di diosnan falsu.

3Siendo tòg tabata Ami

ku a siña Efraim kana

i a karg'é riba brasa.

Pero nan no kièr a rekonosé

ku t'Ami tabata kuida nan.

4Mi a guia nan ku frenanan suave,

ku rienda di amor.

Mi tabata pa nan manera esnan

ku ta hisa e yugo ora e ta primi

kontra di e kakumbeinnan.

Mi tabata duna nan nan kuminda.

5Nan lo no regresá Egipto,

ma Asiria lo reina riba nan,

pasobra nan ta nenga di kombertí.

6Guera lo tin den nan siudatnan,

ta kibra portanan habri,

e pueblo ta muri pa motibu di nan mal intenshonnan.

7Mi pueblo ta persistí den infieldat na Mi;

nan gritunan ta bai laria sí, pa purba alkansá Mi,

pero nan no ta logra nada.

8Efraim, kon lo Mi por bandoná bo,

kon lo Mi por entregá bo, Israel?

Kon lo Mi por bandoná bo manera Adama,

trata bo manera Seboim?

Mi kurason ta stroba Mi di hasi esei,

duele ta konmové Mi.

9Lo Mi no baha mi rabia,

lo Mi no bolbe destruí Efraim.

Mi ta Dios, Mi n' ta hende,

e Dios Santu meimei di boso;

p'esei Lo Mi no bira furioso.

10Nan lo sigui SEÑOR!

Lo E grita manera leon

i ora E grita,

su yunan lo bini yen di rèspèt

for di e paisnan na kosta.

11Yen di rèspèt nan ta bini,

manera para for di Egipto,

manera palomba for di Asiria.

Mi ta hiba nan nan mes kas bèk.’

Esaki ta loke SEÑOR ta bisa.

Maldat di Israel

12SEÑOR ta bisa:

‘Efraim ta rondoná Mi ku mentira,

pueblo di Israel ta rondoná Mi ku engaño,

Huda no tin sufisiente na Mi,

e Dios santu i fiel.