1 Timoteo 5 - Papiamentu Bible 2013(PB13)

Obligashon ku otro hende

1No koregí un hende hòmber di edat na mal manera, pero papia kuné manera ta ku bo mes tata bo ta papia. Anto koregí e hóbennan manera ta bo mes ruman nan ta.

2Koregí e hende muhénan di edat manera ta bo mes mama nan ta i tambe e mucha muhénan hóben manera ta bo mes ruman nan ta, sin mal intenshon.

3Sostené biuda ku a keda kompletamente nan so!

4Pero si un biuda tin yu òf ñetu, ta nan mester siña kumpli promé ku nan deber ku nan mes famia i asina paga bèk loke nan famia a hasi pa nan. Esei ta agradá Dios.

5E biuda ku a keda kompletamente so, sin niun hende pa kuid'é, a pone tur su speransa den Dios; di dia i anochi e ta resa, hasi petishon na Dios.

6Pero un biuda ku ta entregá su mes na plaser a muri spiritualmente kaba, ounke e ta na bida ainda.

7Ordená e biudanan pa nan sigui e instrukshonnan akí, ya niun hende no tin nada di reprochá nan.

8Si un hende no kuida su mes famia, spesialmente esnan ku ta biba den kas huntu kuné, el a rechasá su fe i ta pió ku esnan ku no ta kere.

9Pone riba lista di e biudanan solamente esnan di no ménos ku sesenta aña, ku tabata fiel na nan kasá.

10Nan mester ta konosí komo hende ku ta hasi bon obra. Mester wak si nan a kria esnan ku a lanta serka nan bon, si nan a mustra hospitalidat, si nan a laba pia di esnan ku ta pertenesé na pueblo santu di Dios, si nan a yuda hende den problema, den un palabra, si nan a dediká nan mes na tur sorto di obra di karidat.

11Pero nenga di pone biuda hóben riba lista, pasobra ora e deseonan ku ta stroba nan di sirbi Kristu komo biuda lanta, nan ta haña gana di kasa atrobe!

12E ora ei nan lo ta kulpabel di a kibra e promesa ku nan a hasi anteriormente pa sirbi Kristu komo biuda.

13Ademas nan ta tuma pa kustumber di pasa kas pa kas i hasi kos di floho; anto esei no ta tur kos, no solamente nan ta bira floho, pero tambe hasidó di redu ku ta mete den loke no ta toka nan i ta papia loke nan no mester papia!

14P'esei mi ke pa e biudanan hóben kasa, haña yu i manehá nan kas, ya nan no ta duna nos enemigu chèns pa kritiká nos.

15Pasobra algun di nan a desviá i ta sigui Satanas kaba!

16Pero den kaso di e biudanan mas bieu, si un di nan ta famia di un muhé kreyente, t'é mester kuid'é i no lag'é bira un karga pa iglesia, ya asina iglesia por kuida e biudanan ku di bèrdat a keda kompletamente so.

Ansiano i kongregashon

17E ansianonan ku ta guia iglesia bon, meresé dòbel honor, spesialmente esnan ku a tuma e trabou di prediká i duna siñansa.

18Pasobra Skritura ta bisa: ‘No bisti un bue bosal, ora bo ta us'é pa trabou di bati trigo’

19No pèrmití pa niun hende, ku no tin dos òf tres testigu na su banda,Deuteronomio 17:6; 19:15 entregá un akusashon kontra di un ansiano.

20Skual e ansianonan, ku ta sigui den piká, públikamente, ya e otronan ta kohe kurpa.

21Mi ta enkargá bo seriamente, ku Dios, Hesu-Kristu i e angelnan skohí komo testigu, pa sigui e reglanan akí, sin diskriminá òf tuma parti pa niun hende!

22No pone man riba hende muchu lihé ni bira kómplise den piká di otro hende; tene bo mes puru.

23No bebe awa so, pero bebe un tiki biña tambe pa bo stoma i e hopi malesanan ku bo sa sinti.

24Tin hende ku nan piká ta asina bisto ku promé ku hiba nan dilanti hues, nan piká mes a sali na kla kaba. Pero tin otro hende ku nan piká ta sali na kla te despues.

25Asina tambe bon obra ta bisto i asta esnan ku no ta dje bisto ei no ta keda skondí!