Éksodo 33 - Papiamentu Bible 2013(PB13)

Moises ta pidi SEÑOR pa kompañá e pueblo

1SEÑOR a bisa Moises: ‘Bai ku bo pueblo for di aki, e pueblo ku bo a saka for di Egipto. Bai ku nan e tera ku solemnemente Mi a primintí Abraham,Génesis 12:7 IsakGénesis 26:3 i YakobGénesis 28:13 di duna nan desendientenan.

2Mi ta manda un angel pa guia boso i Mi ta kore ku e kanaanita-, amorita-, hetita-, perizita-, hiwita- i yebusitanan.

3Bai e tera ei ku ta mana lechi i miel. Mi sí no ta bai ku boso pa Mi no haña Mi ta destruí boso na kaminda komo boso ta un pueblo tèrko.’

4Ora e pueblo a tende e mal notisia akí, nan a bira tristu i a keda sin bisti prenda.

5SEÑOR a ordená Moises bisa e israelitanan: ‘Boso ta un pueblo tèrko. Si Mi bai maske ta un ratu ku boso, Mi ta haña Mi ta destruí boso. Wèl, kita boso prendanan i lo Mi wak kiko Mi ta hasi ku boso.’

6P'esei for di e tempu ku nan tabata na Seru Horeb e israelitanan no a bisti nan prendanan mas.

E tènt di enkuentro

7Moises a lanta un tènt na un bon distansia pafó di e kampamentu i a yam'é: tènt di enkuentro. Es ku ker a konsultá SEÑOR tabata bai e tènt di enkuentro pafó di e kampamentu.

8Ora Moises tabata bai einan, tur hende tabata lanta para na entrada di nan mes tènt i sigui Moises ku nan bista te ora e drenta e tènt.

9Asina Moises drenta e tènt, e pilá di nubia tabata baha bini i keda para na entrada di e tènt miéntras SEÑOR tabata papia ku Moises.

10Ora e israelitanan mira ku e pilá di nubia a keda para na entrada di e tènt, nan tabata hinka rudia na entrada di nan mes tènt.

11SEÑOR tabata papia ku Moises kara kara manera kualke hende ta papia ku su amigu. Despues Moises tabata bai e kampamentu bèk. Su sirbidó, e hóben Yozue, yu di Nun, sí no tabata sali for di e tènt.

Moises ta pidi pa e por mira gran splendor di SEÑOR

12Moises a bisa: ‘SEÑOR, Bo a manda mi bai ku mi pueblo, pero Bo no a bisa mi ken Bo ta manda pa kompañá mi. Bo a bisa mi ku Bo konosé mi bon bon i ku Bo ke mi bon tambe.

13Si ta asina, laga mi sa bo plannan, ya mi tambe por siña konosé Bo i hasi loke Bo ta ferwagt. SEÑOR, kòrda ku e hendenan akí ta bo mes pueblo.’

14E ora ei SEÑOR a bisa: ‘Ta Ami mester bai huntu ku boso pa bo ta trankil?’

15Moises a kontestá: ‘Si Abo mes no ta bai ku nos, no laga nos bai for di aki antó.

16Kon antó e otro hendenan por ripará ku ainda Bo ke ami i bo pueblo bon? N' ta si Bo bai ku nos? N' ta dor di esei ami i bo pueblo ta distinguí nos for di tur otro pueblo na mundu?’

17SEÑOR a bisa Moises: ‘Mi ta bolbe hasi loke bo a pidi, pasobra Mi ke bo bon i tambe pasobra Mi konosé bo bon bon.’

18E ora ei Moises a supliká: ‘Laga mi mira bo gran splendor no, SEÑOR.’

19SEÑOR a kontestá: ‘Lo Mi pasa bo dilanti den tur mi splendor i menshoná mi nòmber: Mi ta SEÑOR. Mi ta duna mi grasia na esun ku Mi ke i Mi ta mizerikordioso ku esun ku Mi ke.Romanonan 9:15

20Lo bo no por mira mi kara sí, pasobra ningun hende no por mira mi kara i keda na bida.’

21SEÑOR a bisa: ‘Wak, serka Mi aki tin un lugá kaminda bo por para riba baranka.

22Ora mi gran splendor pasa, Mi ta hinka bo den un kueba i tapa bo ku mi man te ora Mi kaba di pasa.

23E ora ei Mi ta kita mi man i lo bo mira Mi di patras; mi kara sí ningun hende no por mira.’