Job 17 - Papiamentu Bible 2013(PB13)

1Forsa a bandoná mi,

mi dianan ta kontá,

graf ta yama mi.

2Mi tin sigur

ku tur hende ta hasi bofon di mi

i mi tin ku soportá.

Job ta pidi Dios asept'é para bòrg pa su mes

3Dios, aseptá mi para bòrg pa mi mes,

akaso tin otro hende ku ke hasié pa mi?

4Bo a tapa sintí di mi atversarionan,

anto awor bo ke laga nan triunfá riba mi?

5Si un hende traishoná su amigu

buskando su mes probecho,

su yunan ta karga konsekuensia.

Job ta keha, pasobra hende ta kere ku e ta sin Dios.

6Mi nòmber ta den boka di pueblo,

ku ta skupi den mi kara.

7Mi wowonan kasi no ta mira

dje grandi ei mi pena ta;

mi brasa- i pianan t'asina flènguèflènguè,

ku ni sombra nan n' ta tira.

8Hende hustu ta spanta pa mi destino;

— esta intachabel nan sí ta —

nan ta tira na mi kara

ku mi no ta fiel na Dios.

9Nan ta sigui nan kaminda;

nan man limpi ta haña

dia pa dia mas forsa.

10Laga nan tur presentá aki

i lo mi no haña den nan

niun solo hende sabí.

E úniko speransa di Job ta: muri.

11Mi dianan ta kontá,

mi plannan tur desbaratá,

deseonan di mi kurason tambe.

12Si mi por bai tras di mi amigunan,

anto mi anochi por bira di dia.

Nan ta bisa ku ta pinta un klaridat,

pero ami sa, ku mi ta keda den skuridat.

13Si graf ta e úniko lugá

ku mi por yama mi kas

i ei den skuridat

ya mi kama ta drechá,

14si mi por yama buraku den santana “Tata”

i bichi “Mama” o “Ruman stimá”,

15unda antó mi speransa a keda?

Ken por mustra mi algu

ku meresé konfiansa ainda?

16Akaso e speransa ei

tin ku baha den graf pareu ku mi,

sosegá den stòf huntu ku mi?’