Huesnan 8 - Papiamentu Bible 2013(PB13)

Gideon ta kaba ku e reinan midianita

1E hòmbernan di tribu di Efraim a kunsumí i a tira na kara di Gideon ku e no a manda yama nan, ora el a sali bai bringa kontra e midianitanan.

2El a kontestá nan: ‘Boso no ta ripará ainda ku loke mi a hasi no ta nada kompará ku loke boso a hasi? No ta boso a koroná mi obra?

3Dios a duna boso poder riba Oreb i Zeeb, e hefenan midianita. Kiko ami a hasi kompará ku loke boso a hasi?’ Ora nan a tende e palabranan akí, nan rabia a baha.

4Gideon i su 300 hòmbernan a yega Yordan i krusa. Nan a keda persiguí e midianitanan maske nan tabata hopi kansá.

5P'esei Gideon a pidi e habitantenan di Sukot: ‘Duna mi sòldánan pan, pasobra nan ta morto kansá. Ta Zèbag i Salmuna, dos rei midianita, nos ta persiguí.’

6E lidernan di Sukot a kontest'é: ‘Akaso bo a gara Zèbag i Salmuna kaba? Pakiko nos tin ku duna bo ehérsito kuminda antó?’

7Gideon a rospondé: ‘Asina SEÑOR duna mi poder riba Zèbag i Salmuna, mi ta bati boso ku mata di sumpiña di desierto.’

8El a sali for di e lugá ei i a bai Penuel, kaminda el a pidi meskos. Pero na Penuel nan a kontest'é meskos ku na Sukot.

9Gideon a bisa nan: ‘Ora mi bini bèk sano i salvo, mi ta basha e toren akí abou!’

10Entretantu Zèbag i Salmuna tabata na Karkor ku 15.000 hòmber. Esei tabata tur loke a sobra di e ehérsito formá pa e tribunan di oriente; 127.000 sòldá a muri.

11Gideon a sigui riba e kaminda ku ta yega te na desierto, na parti ost di Noba i Yogbaha. Di sorpresa el a ataká e ehérsito i a derotá nan.

12Zèbag i Salmuna a hui bai, pero Gideon a persiguí nan i a kapturá tur e dos reinan di Midian. El a hinka pániko den henter e ehérsito.

13Ora Gideon, yu di Yoash, a kaba di bringa, el a bini bèk via e pasashi di Hèrès.

14El a kohe un mucha hòmber di Sukot prezu i a interog'é. E mucha a skibi nòmber di 77 ansiano i otro lider di Sukot p'e.

15E ora ei Gideon a bai Sukot i a bisa e habitantenan: ‘Boso ta kòrda kon boso a hasi chèrchè di mi pa motibu di Zèbag i Salmuna? Boso ta kòrda kon boso a puntra mi: “Di kon nos tin ku duna bo ehérsito kansá pan, siendo bo no a kapturá Zèbag i Salmuna ainda?” Wèl, ata nan aki!’

16Gideon a kohe mata di sumpiña di desierto i a duna e ansianonan di Sukot un bon halá di sota.

17Despues el a basha e toren di Penuel abou i mata e hòmbernan di e siudat.

18E ora ei el a puntra Zèbag i Salmuna: ‘Kiko boso por konta di e hòmbernan ku boso a mata na Tabor?’ Nan a kontestá: ‘Nan tabata parse bo; kada un tabatin aparensia di un prínsipe.’

19Gideon a grita: ‘Tabata mi rumannan di mama i tata! Mi ta hura pa SEÑOR ku si boso lo a laga nan na bida, ami lo no a mata boso.’

20El a bisa su yu mayó Yètèr: ‘Ban mira, mata nan!’ Pero Yètèr tabata hopi yòn i e no tabatin kurashi di saka su spada.

21Zèbag i Salmuna a bisa Gideon: ‘Ban mira, bo mes mata nos! Un hòmber fuerte manera bo tin basta forsa pa mata nos!’ E ora ei Gideon a mata Zèbag i Salmuna. Despues el a kita e adornonan den forma di luna, ku e kamelnan di Zèbag i Salmuna tabatin na nan garganta.

22E israelitanan a bis'é: ‘Unabes ku bo a salba nos for di e midianitanan, nos ta pidi bo pa abo i bo desendientenan goberná nos.’

23Pero Gideon a kontestá: ‘Ni ami ni mi yu hòmber lo no goberná boso, pero SEÑOR lo goberná boso.

24Un kos sí mi ker a pidi boso: laga kada hende duna mi un renchi for di su botin.’ E sòldánan enemigu akí, ku Gideon a derotá, tabata biba den desierto i tabatin kustumber di bisti renchi di oro.

25Nan a kontestá: ‘Ku plaser nos ta duna bo e renchinan!’ Nan a habri un mantel abou i tur hende a tira un renchi den dje.

26E oro di e renchinan ku Gideon a pidi, tabata pisa mas o ménos 19 kilo sin konta tur e adornonan den forma di luna, e renchi di oreanan, e bistínan kòrá püs ku e reinan midianita tabata bisti i e kadenanan ku e kamelnan tabatin na nan garganta.

27Ku e oro Gideon a traha un efod. El a pon'é na su siudat Ofra. Henter Israel a bira infiel na SEÑOR i a kuminsá adorá e efod. E efod a bira un trampa pa Gideon i su famia.

28Asin'ei e midianitanan a keda derotá i nunka mas nan no por a lanta kontra e israelitanan. Tempu di Gideon a reina pas den e pais durante kuarenta aña.

Morto di Gideon

29Despues Yerubaal, esta Gideon, yu di Yoash, a bai biba den su mes kas.

30E tabatin hopi kasá. Nan a dun'é setenta yu hòmber.

31Su konkubina ku tabata biba na Shikem a dun'é un yu hòmber ku el a yama: Abimelèk.

32Gideon, yu di Yoash, a muri na edat avansá. Nan a der'é den e graf di su tata na Ofra, siudat di Abiezèr.

33Despues ku Gideon a muri, e israelitanan a bolbe bandoná SEÑOR pa nan adorá Baal. Nan a hasi Baal-Berit nan dios.

34E israelitanan no tabata kòrda riba SEÑOR, nan Dios, ku a salba nan for di man di tur e enemigunan ku tabata rondoná nan.

35Nan no tabata gradesido tampoko na famia di Yerubaal-Gideon, pa tur e kosnan bon ku el a hasi pa Israel.