Numbernan 12 - Papiamentu Bible 2013(PB13)

Miriam ku Aaron ta diskutí maneho di Moises

1Moises a kasa awor ku un muhé di Etiopia. Esei tabata motibu pa Miriam ku Aaron kritik'é.

2Nan tabata bisa: ‘Ta pa medio di Moises so SEÑOR a papia antó? E no a papia pa medio di nos tambe?’ SEÑOR a tende e kos ei

3i komo Moises tabata un hòmber mashá humilde, esun di mas humilde di tur hende riba mundu,Sirag 45:4

4SEÑOR a bisa Moises, Aaron ku Miriam mesora: ‘Boso tres bai tènt di enkuentro.’ Nan tres a bai.

5Awor SEÑOR a baha den un pilá di nubia bai para na entrada di tènt di enkuentro. El a yama Aaron ku Miriam i tur dos a bini dilanti.

6El a bisa: ‘Skucha loke Mi tin di bisa: Ora tin un profeta entre boso, Ami, SEÑOR, ta presentá Mi n'e den vishon i papia kuné den soño.

7Pero Mi no ta hasi asina ku mi sirbidó Moises. E ta e sirbidó di mas fiel den tur mi sirbidónan.Echonan 3:2

8Kuné Mi ta papia direktamente, kla, sin nada misterioso. Asta e mag mira Mi. Kon boso a tribi kritiká mi sirbidó Moises?’

9Furioso SEÑOR a bai laga nan.

10Apénas e nubia a kita bai for di tènt di enkuentro, ku Miriam tabata tur na kalor: e kalor tabata parse sneu! Ora Aaron a bira wak Miriam, el a mira ku Miriam tabatin lepra.

11Aaron a bisa Moises: ‘Ai shon, no laga nos sufri pa e piká ku nos a hasi den nos lokura.

12No laga pa Miriam ta manera un yu ku a nase morto, ku a bini riba mundu ku su kurpa mitar putrí.’

13Moises a grita bisa SEÑOR: ‘Ai SEÑOR, lag'é bira bon atrobe!’

14SEÑOR a bisa Moises: ‘Si ta su tata lo a skupié den su kara, lo e mester a keda shete dia ku e bèrgwensa. Ke men anto ku mester ser'é shete dia pafó di kampamentu.Numbernan 5:2-3 Despues di esei e mag drenta kampamentu atrobe.’

15A sera Miriam shete dia pafó di kampamentu. Pueblo no a sigui, promé ku Miriam a djòin nan atrobe.

16Despues pueblo a sali for di Haserot i lanta nan kampamentu den desierto di Paran.