1 Sa bon kiko bo ta bai hasi, ora bo ta bai tèmpel: no bai ofresé sakrifisio manera e hende lokonan, ku no sa ku nan ta hasi malu, pero bai dispuesto na obedesé Dios.
2No pura hasi promesa na Dios, ni ku boka ni ku pensamentu, pasobra Dios ta den shelu i abo ta riba mundu bo ta. P'esei papia ménos posibel.
3Pasobra si bo bisa di mas,
bo ta papia ko'i loko,
manera hende ta haña pesadia
ora nan kansa kurpa di mas.
4Ora bo hasi un promesa na Dios,
no tarda pa kumpli,
pasobra Dios no ta gusta hende dònferstan.
Kumpli ku loke bo primintí,
5pasobra keda sin primintí ta bal mas ku primintí i keda sin kumpli.
6No papia sin pensa. Pasobra despues lo bo haña bo ta bisa e representante di Dios ku tabata un kibukashon. Pakiko lo bo papia asina tantu pone Dios rabia destruí bo trabou?
7Pasobra soña i papia hopi ta mes sin sentido. Preferibel tene rèspèt di Dios.
Rikesa ta sin sentido8No keda asombrá ku tin hende ku ta oprimí hende pober i kita tur nan derechonan. Pasobra funshonarionan di estado ta protegé otro te den e rangonan di mas altu.
9Si rei mes tene lei den su man hende pober tin chèns ainda.
10Hende ku plaka nunka no tin sufisiente plaka; hende ku stima rikesa nunka no ta satisfecho ku su entrada. Esaki tambe ta ilushon.
11Mas grandi e propiedat,
mas tantu hende ke probechá di dje.
Kiko e doño tin antó na e propiedat?
Wak so e por wak e.
12Ku un obrero a kome tiki
òf kome hopi
e ta drumi dushi,
pero e hende riku ku nunka no tin basta
no por drumi trankil.
13Mi a mira un kos teribel:
un hende a spar tur su sèn,
ma esei a bira su desgrasia.
14Kontratempu a pon'é pèrdè tur kos; e no por a laga nada atras pa su yu hòmber.
15Mes sunú ku el a nase a der'é.
E no por a bai ku nada
ku el a mata kurpa p'e.
16E kos akí tambe ta mashá lamentabel:
manera un hende a nase
asina e ta muri,
i kiko el a gana
ku tur su matamentu di kurpa pa bientu?
17Su bida aki na mundu tabata mizerabel,
e tabata kome den sukú
i tabata yen di frustrashon, tormento i rabia.
18Mi a deskubrí ku e mihó kos i kos mas agradabel ta: kome i bebe i gosa di e fruta di tantu mata kurpa riba e mundu akí durante e tempu kòrtiku ku Dios ta duna nos, pasobra esei ta loke ta toka nos.
19Enberdat, si Dios duna bo rikesa i propiedat i duna bo bida i salú pa gosa di nan, si bo haña bo parti i ta felis ku tur bo trabou, ta un regalo di Dios esei ta.
20Pasobra Dios ta duna e hende ei bida i salú pa gosa, e hende no ta preokupá mashá pa kiko ta pasa òf laga.
Who We AreWhat We EelieveWhat We Do
2025 by iamachristian.org,Inc All rights reserved.
