Isaías 54 - Papiamentu Bible 2013(PB13)

Futuro glorioso di Herusalèm

1Kanta, Herusalèm, basha gritu di húbilo!

Bo tabata manera hende sin yu,

muhé ku nunka n' pari

ni nunka no a konosé doló di parto.

Hubilá, pasobra SEÑOR ta bisa bo:

‘Abo, muhé bandoná, lo ta riku na yu,

mas riku ku kualke muhé ku hòmber.’

2Hancha bo espasio di biba,

habri paña èkstra pa traha tènt,

no spar tela.

Hasi kabuyanan mas largu,

pega pènchinan bon pegá.

3Pasobra bo ta bai hancha di tur banda.

Bo yunan lo poderá di teritorio di pueblonan strañero

i bolbe pobla siudatnan bandoná.

4Lo bo no ta humiliá mas,

asina ta, no spanta.

Lo bo no ta deshonrá mas,

asina ta, no ansha.

Bèrgwensa di bo hubentut,

deshonra di ta biuda,

pronto lo kita fo'i bo mente.

5Pasobra bo Kreador, SEÑOR soberano,

ta kasa ku bo.

Dios Santu di Israel ta sali pa bo,

sí, Esun ku nan ta yama

‘Dios di henter mundu’.

6Herusalèm, bo ta manera un muhé

ku su kasá a bandoná

i ku ta mashá abatí,

pasobra e hòmber n' stim'é mas,

manera ten e tabata yòn.

Pero awor SEÑOR, bo Dios, ta yama bo bèk i bisa bo:

7‘Ta pa tempu kòrtiku numa M'a bandoná bo,

awor atrobe Mi ta bin buska bo,

pasobra Mi tin hopi duele di bo.

8Momento ku mi rabia a lanta

p'un ratu M'a arnegá bo.

Pero ya ku mi amor pa bo ta eterno,

Mi ta bolbe demostrá bo mi kompashon.

Ami, ku ta sali pa bo, ta bisa bo asina.

9Esaki ta pone Mi kòrda dianan di Noe.

E tempu ei M'a hura,

ku Mi n' ta laga awa tapa mundu nunka mas.

Asina tambe Mi ta hura awor:

Mi n' ta rabia ku bo nunka mas

ni nunka mas Mi n' ta menasá bo.

10Asta si serunan kambia di lugá

i seritunan tambaliá,

mi amor pa bo sí no ta kambia hamas,

mi kompromiso pa sigurá bo felisidat

tampoko no ta tambaliá.

T'Ami, SEÑOR, ta bisa esei,

Ami ku ta demostrá bo mi kompashon.

11O siudat flihí,

asotá pa tempestat,

sin niun alma pa konsolá bo,

skucha!

Mi ta lanta bo murayanan riba fundeshi di safiro

i pega bo blòkinan ku semènt kostoso.

12Mi ta hasi bo torennan di rubí,

bo portanan di garnafein

i tur bo murayanan di piedra presioso.

13Tur bo habitantenan lo bin siña serka Mi,

nan lo biba den gran prosperidat.

14Mi ta bai libra bo,

bo por tin sigur.

Protegé kontra tur forma di opreshon,

lo bo n' tin nada di teme mas.

Lo bo ta librá di teror

ku no ta menasá bo mas.

15Si un hende buska bo pelea,

ta sin mi konsentimentu e ta hasi esei.

Ken ku buska bo guera,

tin ku entregá su mes na bo.

16Kòrda bon,

e smet ku ta waya kandela pa traha un bon arma,

ta mi kriatura e ta;

di mes manera M'a krea tambe

e guerero kende, ku e arma akí,

ta sembra morto i destrukshon.

17P'esei ningun arma trahá pa hasi bo daño

no ta logra nada kontra bo.

I si un hende ke akusá bo dilanti di un tribunal,

bo por proba k'e ta gaña.

T'esaki M'a prepará pa mi sirbidónan.

T'Ami nan tin ku gradisí pa nan liberashon.

Ta mi mes palabranan esakinan ta.’