Isaías 34 - Papiamentu Bible 2013(PB13)

Pèrdishon di Edom

1Pueblonan, hala serka i tende!

Nashonnan, atenshon!

Mundu ku tur loke ta riba dje,

tera ku tur hende ku ta biba riba dje

mester paga tinu!

2SEÑOR ta razu riba pueblonan,

ku furia E ta lanta kontra nan ehérsitonan.

El a destiná nan pa eksterminashon

i laga mata tur.

3N' ta dera nan mortonan,

e kadavernan ta manda mal holó;

serunan ta papá di sanger.

4Tur astro selestial ta desintegrá,

shelu ta lora manera ròl di pèrkamènt;

tur strea ta bini abou

manera blachi morto na palu di wendrùif,

fruta pashimá na palu di figo.

5SEÑOR ta bisa:

‘Mi spada a kaba di bebe su barika yen den shelu.

Wak awor kon e ta baha riba Edom

pa ehekutá sentensia dje pueblo

ku Mi a destiná pa eksterminashon total.’

6Spada di SEÑOR ta bañá den sanger,

e ta choria vèt,

sanger manera ora mata lamchi i chubat'i kabritu,

yen di sebu di nir di chubat'i karné.

Pasobra SEÑOR ta selebrando un gran sakrifisio na Bosra,

un masakre masal den pais di Edom.

7Na mes momento búfalonan tambe ta dal abou,

toro yòn i toro grandinan.

Pais dje edomitanan ta papá di sanger,

su suela saturá di vèt.

8Pasobra ta tempu di SEÑOR su vengansa,

ta aña pa E sali pa Sion

i regla kuenta ku Sion su enemigunan.

9Awa den roinan lo bira breu,

tera lo ta suafel,

e pais, un solo masa di breu ardiente,

10ku lo kima di dia i anochi;

huma pretu ta subi fo'i dje sin fin.

E pais lo ta desolá pa semper

i ningun hende lo no pasa nunka mas den dje.

11Pelikan i porkispiña lo hasi doño riba dje,

palabrua i raf lo traha nan nèshi ei.

Ku sinta di midi i chumbu di mèsla

SEÑOR lo marka e tera,

p'e keda pa semper bashí i sin forma.

12Noblesa dje pais no por konta

ku niun hende ku nan por proklamá rei,

tur lider a disparsé.

13Mat'i sumpiña ta yena palasionan,

wabi i bringamosa ta tapa fòrtinan;

nan ta dominio di chakal,

lugá pa abestrus biba.

14Ei bestia di desierto ta topa ku hiena,

spiritunan di mondi ta reuní;

zumbi ku ta spok anochi ta biba aya

i ta haña un lugá pa sosegá.

15Ei palabrua ta traha su nèshi i pone webu,

e ta brui nan

i skonde su yunan den sombra di su alanan.

Warawara tambe ta reuní,

kada gai ku su galiña.

16Buska den buki di SEÑOR numa,

bo ta haña tur esei.

Lo no falta niun di e bestianan akí,

ni ún embra lo no ta sin machu.

Pasobra boka di SEÑOR mes a papia,

ta su spiritu ta trese nan huntu.

17El a lòt i parti e pais bou di nan;

El a marka tereno di kada un ku su sinta di midi.

Esaki ta nan propiedat pa semper,

aki nan lo biba siglo aden siglo afó.