E kanto di tur kanto 8 - Papiamentu Bible 2013(PB13)

1Ai, mare bo tabata mi ruman hòmber,

ku a bebe lechi di mi mama!

Antó ora nos lo a topa,

lo mi por a sunchi bo

sin ku esei lo a pone mi na bok'i pueblo.

2E ora ei lo mi a kohe bo man tene

hiba bo kas di mi mama

i lo bo a bira mi maestro di amor;

ami lo a ofresé bo un traguito di biña aromátiko,

o di nèktar di mi granatapelnan.

3Su brasa robes ta bou 'i mi kabes,

esun drechi ta primi mi den su kurpa.

4O, damitanan di Herusalèm,

mi ke puntra boso ku insistensia:

Pakiko lanta stimashon,

pakiko provok'é,

promé ku e mes ke tum'aden?(E mucha muhénan di stat)

5Ta ken esei,

esun ku ta bini for di den desierto ayá,

ilèn riba su amor?

Mucha muhé

Ta bou di e palu di apel

mi a spièrta bo amor,

e mes lugá kaminda bo mama a haña doló di parto,

kaminda esun ku tabatin doló di parto

a trese bo na mundu.

6Pone mi na bo kurason

manera e rench'i seyo kologá na bo garganta;

bisti mi na bo brasa

manera e piedra ku bo nòmber grabá.

Sí, amor ta mes poderoso ku morto,

skapa di pashon mes imposibel

ku skapa di graf.

Su chispanan ta chispa di kandela,

vlandam di SEÑOR.

7Tur awa di laman no ta kapas

pa paga e kandela di amor,

niun riu no por lab'é bai kuné.

I ken ku pensa di por kumpr'é,

ni maske e ofresé tur su rikesa,

lo e keda bochorná.

Kanto Final(Ruman hòmbernan)

8Nos tin un ruman muhé hóben,

su pechunan no a sali ainda.

Kiko nos lo hasi,

ora un hende pidi pa namor'é?

9Si nos ruman resultá un muraya,

nos ta pone baluarte di plata riba dje,

pero si e ta un porta habrí,

nos ta klab'é ku balki di seder!

Mucha muhé

10Mi tabata un muraya,

mi pechunan manera e torennan riba dje.

Pero el a kambia mi,

n'e m'a entregá mi fòrti.

11Salomon tin un hòfi di wendrùif na Baal-Hamon.

El a konfi'é den man di guardianan.

Hende tabata paga kasi mil moneda di plata

pa e frutanan di e hòfi.

12Salomon, keda ku bo mil monedanan numa,

i boso, guardianan, ku e dosshen!

Mí hòfi di wendrùif sí,

t'ami mes ta kuid'é.

Mucha hòmber

13Mi dushi, aya den bo hardin,

mi kompañeronan ta habri nan orea

pa tende loke bo ta bisa.

Laga ámi so tende:

Mucha muhé

14Kore, mi amor,

kore manera gasela,

manera yu 'i biná

riba serunan yen di yerb'i bálsamo!