1E ora ei Bildad di Shuag a bolbe tuma palabra:
2‘Ki dia ta yega un fin
na blablamentu di hende manera bo?
Si bo tabata rasonabel,
nos lo por a papia ainda.
3Kiko ta pone hende manera bo pensa
ku nos ta buriku bestia?
4Bo ta kushi di rabia!
Akaso bo ta kere,
ku tur kos mester bira
kabes abou pia na laria,
djis pa komplasé bo;
ku Dios mester kita barankanan fo'i nan lugá,
djis pa duna bo gustu?
Dios ta kastigá hende malbado5Nò, Job,
lus di bida di un mal hende lo paga
i manera kandela ku a kaba na nada,
e ta para bira friu.
6Lo e ta manera un tènt skur, lus pagá
i ku lampi kologá na dje, tambe sin klaridat.
7Su pasonan vigoroso ta bira insigur,
e ta dal abou, víktima di su propio kòmplòt.
8Su mes pia ta hib'é bai dònder abou den buraku,
e no ta pisa suela firme.
9Un klèm ta ten'é na su hilchi,
un trampa ta klap sera,
peg'é duru aden.
10A skonde un las p'e riba suela,
a arma un trampa den su kaminda.
11E ta sintié menasá unda k'e bira;
persiguí kada stap ku e dal.
12Hamber ta kaba ku su forsa;
kalamidat ta drumi ward'é trompeká.
13Fèrmidat, yu mayó di Lamuèrtè,
ta kome na su kurpa tiki tiki,
for di kueru te na wesu.
14Lamuèrtè ta lastr'é saka for di e hogar,
kaminda e tabata biba trankil
i ta hib'é bai pon'é te dilanti di hefe
dje kompinchinan di morto.
15Ken ku ta por okupá e kas,
ku el a laga atras.
Ta basha suafel riba su tereno
ya nada no ta krese mas.
16E ta bira manera un palu, ku ta seka
for di su rais den suela
te na su ramanan na altu.
17Niun hende na mundu no ta kòrda mas riba dje,
tur hende a lubid'é.
18A sak'é fo'i lus push'é den skuridat,
dester'é for di tera di bibunan.
19E no ta laga yu atras, ni desendensia
i e lugá kaminda e tabata biba
a keda kompletamente bandoná.
20Di ost te wèst notisia di su suerte ta kore,
tur hende ta konsterná i babuká.
21Ata, b'a weta?
T'asina hogar di hende
ku ta biba sin Dios ta!
T'asina lugá di hende
ku no ke baha kabes pa Dios ta keda!’
Who We AreWhat We EelieveWhat We Do
2025 by iamachristian.org,Inc All rights reserved.
