Levítiko 15 - Papiamentu Bible 2013(PB13)

Impuresa seksual di hende hòmber

1SEÑOR a ordená Moises i Aaron pa

2bisa e israelitanan lo siguiente:

‘Ora un hòmber tin drep, e malu akí ta hasié impuru.

3Sea ku e sleim ta sali fásilmente òf difísilmente, e hòmber ta impuru tanten e ta den e estado ei.

4Tur kama ku e hòmber ku drep drumi ariba òf tur loke e sinta ariba, ta bira impuru.

5Esun ku mishi ku e kama ei, mester laba su pañanan i dal un baño; e ta keda impuru te ora nochi sera.

6Esun ku kai sinta riba un opheto ku un hòmber asina a sinta ariba, mester laba su pañanan i dal un baño, e ta keda impuru te ora nochi sera.

7Esun ku mishi ku e hòmber ei mester laba su pañanan i dal un baño, e ta keda impuru te ora nochi sera.

8Si un hòmber ku drep skupi riba un hende puru pa demostrá su menospresio, e delaster akí mester laba su pañanan i dal un baño, e ta keda impuru te ora nochi sera.

9Tur sia ku e hòmber ku drep usa ta bira impuru.

10Ken ku mishi ku un opheto ku e hòmber ku drep a usa pa sinta riba dje, ta keda impuru te ora nochi sera. Ken ku transportá un opheto asina, mester laba su pañanan i dal un baño, e ta keda impuru te ora nochi sera.

11Ken ku e hòmber asina mishi kuné sin laba man, mester laba su pañanan i dal un baño, e ta keda impuru te ora anochi sera.

12Si e hòmber malu mishi ku algu trahá di klei, mester kibra e artíkulo ei; si ta algu trahá di palu mester hawa e artíkulo ku awa.

13Si e hòmber kura di su enfermedat, e mester warda shete dia promé ku e bira henteramente puru; e ta laba su pañanan i baña ku awa di bròn; despues di e shete dianan akí e ta puru atrobe.

14Riba e di ocho dia e ta bai para ku dos tòrteldùif òf dos pichon dilanti di SEÑOR, na entrada di tènt di enkuentro, i aya e ta duna saserdote nan.

15Saserdote ta ofresé un di e paranan komo sakrifisio pa pordon di piká i e otro komo sakrifisio di kandela. Asina, dilanti di SEÑOR, e ta drecha tur kos entre e hòmber ku a kura, i Dios.

16Ora un hòmber pèrdè simia, e mester laba henter su kurpa, e ta keda impuru te ora nochi sera.

17Mester laba tur paña di bisti òf tur artíkulo di kueru ku a mishi ku e simia, nan ta keda impuru te ora nochi sera.

18Ora un hòmber i un hende muhé tabatin relashon seksual ku otro, tur dos mester dal un baño, nan ta keda impuru te ora nochi sera.

Impuresa seksual di hende muhé

19Ora un muhé tin su regla ku sanger ta sali for di su kurpa, e ta keda shete dia impuru. Ken ku mishi kuné ta bira i keda impuru te ora nochi sera.

20Tur kama ku e muhé drumi ariba òf tur opheto ku e sinta ariba durante e dianan di su regla ta bira impuru.

21-22Tur hende ku mishi ku e kama ei òf e opheto di sinta ariba ei mester laba su pañanan i dal un baño, e hende ta keda impuru te ora nochi sera.

23Ken ku mishi ku algu ku tabatin riba e kama òf e opheto ku e muhé a usa, ta bira impuru te ora nochi sera.

24Si un hòmber drumi ku un muhé, i sanger di su regla mishi ku e hòmber, e hòmber tambe ta bira shete dia impuru. Tur kama ku e drumi ariba ta bira impuru.

25Si un muhé fuera di su dianan di regla tin bashamentu durante poko dia òf su regla dura mas ku normal, e ta keda tur e tempu ei impuru, meskos ku durante e dianan di su regla.

26Tur kama ku e drumi ariba, tur opheto ku e sinta ariba ta bira impuru, meskos ku durante e dianan di su regla.

27Ken ku mishi ku e kama ei òf e opheto di sinta ariba ei, mester laba su pañanan i dal un baño, e ta keda impuru te ora nochi sera.

28Ora e bashamentu pasa, e muhé mester warda shete dia, pa e bolbe bira puru.

29Riba e di ocho dia e ta kohe dos tòrteldùif òf dos pichon i hiba nan pa e saserdote na entrada di tènt di enkuentro.

30E saserdote ta ofresé un di e paranan komo sakrifisio pa pordon di piká i e otro komo sakrifisio di kandela. Asina, dilanti di SEÑOR, e ta drecha tur kos atrobe entre e muhé ku a kura, i Dios.

31Hinka den e israelitanan pa nan kumpli ku e preskripshonnan di puresa akí. Pasobra lo ta nan morto si nan yega den estado di impuresa den bisindario di e tènt kaminda Mi ta biba meimei di nan.’

32Te asina leu e instrukshonnan enkuanto e hòmber ku bira impuru pa motibu ku e tin drep òf pasobra e ta pèrdè simia,

33tokante un muhé ku tin su regla òf ta sufri di bashamentu, i tambe di e hòmber ku drumi ku un muhé ku ta impuru.