Job 35 - Papiamentu Bible 2013(PB13)

Di tres diskurso di ElihuElihu ta reta Job su pretenshon di inosensia

1I Elihu a kontinuá:

2‘Bo ta haña ta korekto

i bo ta kere ku Dios mester duna bo rason,

3ora bo puntr'É:

“Kuantu asina e malu ku mi ta hasi

por ofendé Bo?

Kiko mi ta gana ku no hasi malu?”

4Mi tin gana di rospondé abo

i bo amigunan tambe.

Elihu ta pretendé ku Job su pikánan no ta afektá Dios, sino amigunan di Job

5Hisa kara wak shelu,

nota e nubianan;

nan ta mas altu ku bo!

6Bo ta puntra:

“Ki diferensia tin pa Dios

si mi hasi piká;

si mi kometé piká tras di piká,

esaki ta ofend'É?”

7É no ta gana nada ku e bon o malu

ku bo hasi, Job.

É no tin niun benefisio di dje.

8Ta bo próhimo t'esun ku ta sufri

ora abo hasi malu,

i t'e tin benefisio ora bo ta hustu.Elihu ta pretendé: Hende ta buska yudansa serka hende i p'esei Dios no ta kontestá nan

9Bou di peso di opreshon hende ta grita wèl

i buska ken lo por salba nan

for di man di poderosonan,

10pero nan no ta buska e Dios,

ku a krea nan,

ku por pone kantika di speransa den nan kurason

den e oranan di mas skur,

11ku ta instruí i siña nan

pa medio di bestia rònt di nan

i di para den laria.

12Hende ta grita pidi ousilio,

pasobra hende malbado i orguyoso ta oprimí nan,

pero Dios no ta rospondé.

13No tin moda di hasi; Dios no ta skucha nan,

Todopoderoso no ta ni drei wak nan.

Elihu ta ridikulisá ignoransia di Job

14Di pursi, Job,

bo mes ta bisa,

ku bo no ta haña Dios mira,

ku E ta laga bo warda,

asta awor ku bo kaso ta poné su dilanti.

15Antó fuera di esei,

bo ta bisa tambe:

“Dios no ta rabia ni kastigá!

E no ta wòri mashá ku piká.”

16Ta palabra bashí so, Job

bo boka ta produsí;

bo ignoransia ta yena bo boka ku palabra.’