2 Krónikanan 26 - Papiamentu Bible 2013(PB13)

Uzías, rei di Huda(2 Reinan 14:21-22; 15:1-7)

1Uzías tabatin solamente diesseis aña ora e pueblo di Huda a skoh'é pa sigui su tata Amasías komo rei.

2E ta esun ku despues di morto di su tata a reforsá Elat i tres'é bèk bou di mando di Huda.

3E tabatin diesseis aña dia el a bira rei i el a goberná 52 aña na Herusalèm. Su mama tabata yama Yekolya i tabata di Herusalèm.

4Uzías tabata hasi loke ta bon den bista di SEÑOR. Den tur kos e tabata sigui ehèmpel di su tata.

5Miéntras Zekarías ku a siñ'é tene su bista semper fihá riba SEÑOR, tabata na bida, Uzías a honra SEÑOR i Dios a dun'é prosperidat.

6El a sali bai bringa kontra e filisteonan i a tumba e murayanan di Gat, Yabne i Ashdod. Tambe el a konstruí siudat den region di Ashdod i den restu di e pais di filisteonan.

7Dios a yud'é den su bataya kontra e filisteonan, kontra e arabirnan ku tabata biba na Gur-Baal i kontra e meunitanan.

8E amonitanan tabata pag'é belasting. El a bira asina poderoso ku su fama a kore te Egipto.

9Na Herusalèm Uzías a traha toren na Porta di Huki, Porta di Vaye i na Punta i a reforsá nan.

10Den desierto tambe el a traha toren i pasobra e tabatin un kantidat grandi di bestia di kria, tantu den sabana di Shefela komo den sabana altu, el a laga koba hopi pos. Komo e tabata gusta agrikultura, e tabatin, spesialmente den e serunan i den siudat Karmel, kunukero i trahadó den kunuku di wendrùif.

11Uzías tabatin un ehérsito bon itrein, ku tabata hasi nan trabou den grupo. Nan tabata repartí segun e konteo ku su sekretario Yeiel i su funshonario Maasea a tene bou di supervishon di Hananías, un funshonario altu di rei.

12E ehérsito tabata bou di mando di 2600 kabes di famia.

13Nan tabatin mando riba 307.500 sòldá bon itrein, ku tabata yuda rei den su bataya kontra enemigu.

14Uzías a sòru pa e ehérsito tabatin eskudo, lansa, hèlmu, korasa, bog i piedra pa slengu.

15Tambe el a laga pone aparatonan sofistiká di guera riba toren na Herusalèm i na skina di e murayanan pa por tira flecha i piedra grandi. Su fama a plama tur kaminda; na un manera milagroso Dios a yud'é pa e bira un hòmber poderoso.

16Pero unabes el a haña poder, el a bira orguyoso i esei tabata su pèrdishon. El a falta ku mandamentu di SEÑOR, su Dios, dor di drenta tèmpel i kima sensia e mes riba e altá di sensia.

17Saserdote Azarías i ochenta saserdote di SEÑOR mas, tur hòmbernan balente, a bai Uzías su tras

18pa stòp e i a bis'é: ‘Uzías, bo no mag kima sensia pa SEÑOR, ta e saserdotenan, desendiente di Aaron ku ta konsagrá, so por hasi esei.Éksodo 30:7-8; Numbernan 3:10 Sali for di santuario, pasobra bo a falta ku lei di SEÑOR Dios i lo E no apresiá loke bo ta hasi.’

19Uzías ku ya tabatin e kòmchi di pone sensia den su man a eksitá. Pero miéntras e tabata rabia ku e saserdotenan, el a haña un enfermedat serio di kueru na su frenta, dilanti di e saserdotenan ei serka di e altá di kima sensia.

20Gransaserdote Azarías i tur e otro saserdotenan a keda mir'é; nan a deskubrí ku e tabatin lepra na su frenta i a kore kuné. El a sali pafó mas lihé posibel, pasobra SEÑOR a kastig'é ku lepra.

21Uzías a keda ku e enfermedat di kueru ei te dia el a muri. Tur e tempu ei el a biba den un kas isolá pasobra e tabatin lepra i e no tabatin mag di drenta tèmpel. Su yu Yotam a tuma palasio i gobernashon di pueblo na su enkargo.

22Profeta Isaías, yu di Amoz, a deskribí sobrá historia di Uzías for di antaño te mas resien.

23Uzías a bai sosegáIsaías 6:1 i a der'é serka su antepasadonan. Pasobra e tabatin lepra a der'é apart riba un pida tereno di e reinan, ku nan tabata usa komo santana. Su yu Yotam a siguié komo rei.