1 Krónikanan 22 - Papiamentu Bible 2013(PB13)

1E ora ei David a bisa: ‘Aki e tèmpel di SEÑOR Dios mester bini i tambe e altá pa Israel ofresé su sakrifisionan di kandela.’

Preparashonnan pa konstrukshon di tèmpel

2David a ordená pa trese for di henter pais e hòmbernan, ku ta pertenesé na e poblashon original,1 Reinan 9:20,21; 2 Krónikanan 8:7,8 huntu. Nan mester a kap blòki di piedra pa konstrukshon di tèmpel di SEÑOR.

3Ademas David a laga pone un kantidat grandi di heru kla pa traha klabu pa e portanan i pa traha gancha. Tambe el a perkurá pa asina tantu bròns ku ni pisa no por a pisa e kantidat.

4Tabatin tambe mashá hopi palu di seder, pasobra e hendenan di Sidon i Tiro tabata entregá David e palunan ei na gran kantidat.

5Pasobra David a pensa: ‘Salomon, mi yu, ta yòn i sin eksperensia i e tèmpel ku ta bai traha pa SEÑOR mester ta esun di mas grandi, famoso i bunita, ku henter mundu lo atmir'é. P'esei mi ke hasi e preparashonnan nesesario p'e.’ Asina ta ku David a pone kantidat di kos kla promé ku el a muri.

6Despues David a manda yama su yu Salomon, i a orden'é pa traha un tèmpel pa SEÑOR, Dios di Israel.

7David a bisa Salomon: ‘Mi yu, mi mes tabatin intenshon di traha un tèmpel na honor di SEÑOR, mi Dios,

8pero mi a haña e palabra akí di SEÑOR: “Bo a drama hopi sanger i a bringa den gueranan grandi. Pasobra Mi a mira bo drama asina tantu sanger, Mi ta prohibí bo traha un tèmpel na mi honor.

9P'esei Mi ta duna bo un yu hòmber ku lo trese pas den pais. Pasobra lo Mi perkurá pa tur e enemigunan ku ta rondon'é lag'é na pas. Pa e motibu ei lo e yama Salomon, pas. Mientrastantu e ta na mando lo tin pas i seguridat na Israel.

10Salomon lo traha un tèmpel pa Mi. Lo e ta un yu pa Mi i Ami lo ta un tata p'e. Mi ta perkurá pa su trono para firme na Israel pa semper.”2 Samuel 7:1-16; 1 Krónikanan 17:1-14

11Esei SEÑOR a laga mi sa. Lo E ta ku bo, mi yu, pa bo logra traha e tèmpel pa SEÑOR, bo Dios, manera El a primintí bo.

12SEÑOR, bo Dios, lusa bo sintí i duna bo konosementu dia E pone bo goberná Israel, pa bo kumpli ku su lei.

13Lo bo progresá basta bo kumpli ku e leinan i e mandamentunan ku SEÑOR a duna Israel pa medio di Moises. Sea disididu, tuma un kurashi, no tene miedu,Yozue 1:6-9 no pèrdè ánimo.

14Ku hopi molèster mi a logra pone 35.000 tòn di oro i 3500 tòn di plata un banda pa konstrukshon di tèmpel di SEÑOR, mas un kantidat inmenso di bròns i heru, i ademas palu i piedra. Sigui kompletá e stòk akí.

15Fuera di esei bo tin un multitut di obrero na bo disposishon: kapdó di piedra, mèsla, karpinté, tur klase di hòmber di fishi ku por traha ku oro, plata i bròns.

16Man na obra antó! SEÑOR ta ku bo.’

17David a ordená e lidernan di Israel pa nan yuda Salomon.

18David a bisa nan: ‘No lubidá ku SEÑOR, boso Dios, a yuda boso i ku El a perkurá pa boso gosa di trankilidat na tur boso fronteranan. El a entregá e habitantenan original di e pais akí den mi poder. E pais akí ta someté na SEÑOR i na su pueblo.

19Buska di obedesé SEÑOR, boso Dios, di henter boso kurason, pone man na obra, traha e santuario pa SEÑOR Dios, pa por hiba e arka di aliansa di SEÑOR i e ophetonan sagrado di Dios e tèmpel ku lo traha na honor di SEÑOR.’