1Moises a bisa e hefenan di tribu: ‘Esaki SEÑOR a ordená:
2Si un hende hòmber primintí SEÑOR di hasi algu òf hura di apsten'é di sierto kos, e mester ten'é na su palabra; e mester hasi tur loke el a primintí.
3Pero si ta un muhé hóben, bibá na kas ainda, hasi un promesa òf un huramentu asina,
4i su tata no bis'é nada ora e tata tende, e ora ei tur su promesanan i e huramentu di apsten'é di sierto kos ta keda bálido.
5Pero si su tata tende i ta kontra, niun di su promesanan ni niun di su huramentunan no ta keda bálido. SEÑOR no ta eksigí di dje p'e kumpli, pasobra su tata ta kontra.
6Si un muhé kasa despues ku el a hasi un promesa òf sin pensa hasi un huramentu na SEÑOR
7i su esposo no a bis'é nada ora el a tende, e ora ei tur su promesanan i e huramentu di apsten'é di sierto kos ta keda bálido.
8Pero si su esposo ta kontra ora e tende, e ta hasi e promesa i e huramentu hasí sin pensa, inbálido. SEÑOR no ta eksigí di e muhé p'e kumpli ku nan.
9Un biuda òf muhé divorsiá mester kumpli ku kada promesa i kada huramentu ku e hasi.
10Si un muhé kasá hasi un promesa òf un huramentu
11i su esposo no a bis'é nada ora e tende, e ora ei tur su promesanan i e huramentu di apsten'é di sierto kos, ta keda bálido.
12Pero si su esposo deklará nan inbálido, ora e tende di nan, su promesanan òf huramentu ta bira inbálido. SEÑOR no ta eksigí di e muhé p'e kumpli, komo su esposo a deklará nan inbálido.
13Su esposo por konfirmá kada promesa i kada huramentu di apsten'é di algu òf deklará nan inbálido.
14Si su esposo no bisa nada te su manisé, el a konfirmá tur promesa i tur huramentu ku e muhé a hasi. El a konfirmá nan komo e no a bisa nada, ora el a tende di nan.
15Pero si despues numa e esposo deklará nan inbálido, e mes ta keda responsabel ku e muhé ta keda sin kumpli ku loke el a primintí òf hura.’
16Esakinan ta e leinan ku SEÑOR a duna Moises tokante e relashon ku tin entre un esposo i su esposa i entre un tata i su yu muhé, bibá na kas ainda.
Who We AreWhat We EelieveWhat We Do
2025 by iamachristian.org,Inc All rights reserved.
