Job 37 - Papiamentu Bible 2013(PB13)

1T'asina mes!

Ora mi mira tormenta,

mi kurason ta bati te den mi boka.

2Paga tinu, boso tur,

tende stèm di SEÑOR

ku ta ronka manera bos,

tende e zonido duru

ku ta sali fo'i su boka!

3E ta lansa su rayonan di welek den shelu,

nan ta alkansá tur huki di mundu.

4Despues bo ta tende un tumulto,

ta su stèm mahestuoso ta resoná;

bo no por soportá e welek,

ora su stèm zona.

5Ora Dios pone su stèm ronka,

hende ta keda babuká;

Dios ta hasi milager

ku nos no por komprondé.

6Pasobra E ta bisa sneu:

“Kai riba mundu”,

i pa medio di su poder E ta bisa:

“Áwaseru kai!”,

i nan ta bira basha.

7E tin tur hende man mará

i nan mester atmití

ku tur kos ta den su man.

8Bestianan ta drenta nan hòl

i ta keda skondí eiden.

9Warwarú ta sali for di su kamber

i bientu ta supla pone friu kòrta.

10Rosea di SEÑOR ta pone tur kos kongelá,

superfisie di awa ta bira duru duru.

11E ta yena nubianan yen di humedat

i ta laga su rayo kòrta for di nan.

12Nubianan ta drei rònt manera Dios dirigí nan;

nan ta obedesé su komando unda ku nan bai.

13Dios ta manda áwaseru pa muha tera;

E por mand'é pa kastigá hende,

o pa mustra nan ku E ke nan bon.

Elihu ta reta Job pa reflekshoná riba grandesa di Dios den naturalesa

14Tende un kos akí Job!

Para ketu un ratu

i wak e kosnan maravioso ku Dios ta hasi.

15Akaso bo sa di ki manera

Dios ta pone nubianan obedes'É

i welek aparesé den su nubianan?

16Bo sa kon nubia ta flota?

Ta obra maravioso di Esun,

ku tin konosementu perfekto!

17Ora bo ta pará tur sodá,

pasobra bientu di zùit ta pone

ku airu ta muchu kayente pa bo hala rosea,

18bo por yuda Dios span e shelu antó

i hasié mes duru ku koper lombrante?

19Bisa nos kiko nos lo por bis'É?

Nos sintí ta tapá

i nos no tin nada di bisa.

20Ami lo no pidi pa papia ku Dios.

Loko bo ta?

Mi n' ke muri na man di Dios!

21Un momento solo ta skonde tras di nubianan;

djis despues,

ora bientu kaba di bari shelu limpi limpi,

e ta bria atrobe.

22E ora ei Dios ta bini for di nort

ku splendor di oro,

splendor atmirabel ku ta rondon'É!

Elihu ta kòrda Job riba e echo, ku Dios no ta hasi kaso di hende, ku ta kere nan mes sabí

23Todopoderoso ta asina grandi,

ku nos no por aserk'É;

E ta hustu i bon

i no ta oprimí hende.

24P'esei tur hende tin temor di djE.

Pero Dios no ta ni hasi kaso di hende,

ku ta kere nan mes sabí.’