Hoséas 12 - Papiamentu Bible 2013(PB13)

1Efraim ta okupá su mes ku airu,

henter dia e ta kore tras di bientu,

e ta akumulá mentira riba mentira,

violensia ta sigui violensia:

nan ta sera un pakto ku Asiria,

pero ta entregá zeta na Egipto.’

2SEÑOR tin un kaso kontra Huda tambe,

E ta bai kastigá e pueblo di Yakob pa nan echonan,

E ta laga nan paga pa loke nan a hasi.

3Den barika di su mama

Yakob a kohe su ruman un kabes abou.

Dia e tabatin forsa di hòmber,

el a bringa ku Dios.

4El a bringa ku un angel

i a gana;

bou di yoramentu el a pidi e ora ei pa tene kompashon kuné.

Na Betel el a topa Dios,

einan Dios a papia kuné;

5SEÑOR, Dios Todopoderoso,

SEÑOR ta su nòmber!

6Bai bèk serka boso Dios anto,

sea fiel i hustu,

keda anhelá semper p'E.

7Efraim ta manera komersiante

ku ta usa balansa ku no ta korekto,

i ku no ta gusta nada otro ku ranka sanger di hende.

8Tòg Efraim ta bisa: ‘Sí, mi ta riku,

mi a haña rikesa.

Na nada ku Mi a gana

no tin inhustisia pegá ku por yama piká, tòg?’

9Pero SEÑOR ta bisa:

‘Mi ta boso Dios,

for di e tempu kaba ku boso tabata na Egipto.

Mi ta laga boso biba atrobe den tèntnan simpel

manera boso ta hasi durante algun fiesta.

10Mi a papia semper ku e profetanan,

duna nan hopi vishon

i laga nan papia den komparashon.

11Guilead tabata un lugá di maldat,

el a kaba na nada.

Na Guilgal nan tabata sakrifiká toro,

nan altánan ya a bira monton di piedra

den roi di kunukunan.’

12Yakob a hui bai Aram,

e mester a traha aya pa haña un esposa,

pa un esposa el a bira wardadó di karné.

13Pa medio di un profeta SEÑOR a saka Israel for di Egipto,

El a nombra un profeta komo nan wardadó.

14Efraim a ofendé SEÑOR profundamente,

pero su SEÑOR lo laga nan karga konsekuensia di nan maldatnan,

kastigá nan pa nan ofensanan.