Salmo 104 - Papiamentu Bible 2013(PB13)

SALMO 104Esta grandi Bo ta, Kreador di mundu!

1Mi alma, alabá SEÑOR,

SEÑOR mi Dios, esta grandi Bo ta!

Bo ta bistí ku splendor i mahestat,

2lorá den un mantel di lus.

Bo a span shelu manera un tènt;

3Bo a planta pilánan di bo salanan

riba e awa aya den altura,

ta laga nubianan sirbi Bo di garoshi,

ta drif riba alanan di bientu;

4ta usa bientu komo mensahero,

vlam di kandela pa sirbiente!

5B'a pone mundu riba su fundeshi,

pa nunka mas e no tambaliá.

6B'a tap'é ku bistí di oséano,

awa tabata pará te riba serunan,

7ma ora Bo a skual e el a hui,

na kareda pa zonido di bo bos,

8subiendo serunan, bahando den vayenan

na e lugá ku Abo a mustr'é.

9B'a pone límite ku nunka e n' por pasa,

nunka mas l'e no subi tera.

10Bo ta manda awa di fuentenan

bai pa riu ku ta kore den serunan,

11awa pa bestia di mondi por bebe

i pa buriku di mondi kita set.

12Eibanda para di shelu tin nan nèshi,

por tende nan kanto den rama.

13Bo ta laga awa yobe riba seru

fo'i den bo salanan altu na shelu;

tera ta yena di fruta di bo obranan.

14Bo ta pone yerba krese pa bestia

i planchi bèrdè pa hende kultivá nan,

pa e gana pan for di tera,

15biña pa alegrá su kurason,

zeta pa lombra su kara

i alimento ku lo tin ku dun'é forsa.

16SEÑOR su palunan ta haña hopi awa,

e sedernan di Libanon, plantá ku su man.

17Ayaden para ta traha nan nèshi,

óyevar tin su kas den nan tòp;

18kabritu di mondi ta den seru

i marmòt shimaron den kueba di baranka.

19Bo a traha luna ku su fasenan

solo sa ki ora e mester baha.

20Bo ta trese skuridat i ta anochi,

bestia di mondi tur ta kuminsá move.

21Yu di leon ta grita yen di gana,

reklamando nan kuminda serka Dios.

22Ku solo sali nan ta bolbe

i nan ta kai drumi den nan kueba.

23Hende ta sali bai traha,

e ta bai su trabou te anochi.

24Ki inkontabel ta bo obranan, SEÑOR!

Bo a traha nan tur ku saber,

tera ta yen di bo rikesa.

25Ata laman, asina hanchu, espasioso,

pimpá di animal inkontabel,

bestia grandi i chikitu.

26Aya barkunan ta sigui nan kaminda,

ayaden tambe ta biba Leviatan,

ku Bo a forma pa Bo hunga kuné.

27Nan tur ta spera di Bo

ku lo Bo duna nan kuminda na tempu.

28Ora Bo duna nan, nan ta rekoh'é;

ora Bo habri bo man,

nan ta yena nan barika ku bo biennan.

29Ora Bo skonde bo Kara nan ta spanta;

ku Bo kita nan rosea nan ta muri

i ta bolbe bira stòf manera ántes.

30Bo manda bo spiritu, ata nan ta kreá

i Bo ta renobá kara di tera.

31Mare gloria di SEÑOR por ta eterno,

ku SEÑOR por gosa di su obranan.

32Si E wak tera, esaki ta tembla,

k'E toka serunan, nan ta saka huma.

33Mi ke kanta pa SEÑOR henter mi bida,

kanta alabá mi Dios

tanten ku mi tin bida i rosea.

34Mare E por gusta mi palabranan,

mi mes ta haña mi goso den SEÑOR!

35Ku pekadónan kaba riba mundu

i no sobra malechornan mas!

Mi alma, alabá SEÑOR!

Alabá sea SEÑOR!