Isaías 20 - Papiamentu Bible 2013(PB13)

E profeta, señal di Egipto i Etiopia konkistá

1Riba òrdu di Sargon, rei di Asiria, e komandante general di ehérsito a ranka sali kontra e siudat filisteo Ashdod. El a atak'é i konkist'é.

2Tres aña promé ku esei a sosodé, SEÑOR a papia ku Isaías, yu di Amoz, na e siguiente manera: ‘Kita e paña di lana fo'i bo kurpa i sandalia fo'i bo pia!’ Isaías a hasi esei i el a kana lomba sunú i pia abou.

3Ora a kaba di konkistá Ashdod, SEÑOR a deklará: ‘Mi sirbidó Isaías ya tin tres aña ta kana rònt lomba sunú i pia abou, komo un señal bibu i un atvertensia pa Egipto i Etiopia.

4Pasobra rei di Asiria lo kohe e hendenan di Egipto i di Etiopia prezu, tantu hóben komo hende bieu, i bai ku nan, lomba sunú, pia abou i atras afó. Esta un bèrgwensa pa Egipto!

5Esnan ku ta konfia riba Etiopia i esnan ku ta broma ku Egipto lo keda mashá desapuntá i tur brongosá.

6E habitantenan di e region akí lo sklama: “Nos a pone nos konfiansa den nan, serka nan nos a buska nos refugio, ta nan lo mester a salba nos for di gara di rei di Asiria. Anto wak awor kiko a para di nan! Ta kiko nós lo por spera?” ’