Isaías 1 - Papiamentu Bible 2013(PB13)

1Aki ta sigui e vishon ku Isaías, yu di Amoz, a haña tokante Huda i Herusalèm tempu ku Uzías,Dios ta akusá su pueblo

2Shelu skucha, tera tende,

pasobra SEÑOR ta tuma palabra:

‘Mi a kria yu te nan a bira grandi

i awor nan a lanta kontra Mi.

3Un bue konosé su doño,

un buriku e shon ku ta pone yerba den su pesebre,

pero Israel no ke konosé Mi;

mi pueblo no tin tinu pa Mi.’Kastigu pa Huda

4Ai di boso, pueblo pekadó,

nashon kurtí den maldat,

rasa di malechor,

yunan perverso.

Boso a bandoná SEÑOR,

despresiá Dios Santu di Israel

i bira lomba p'E.

5Unda na boso kurpa a sobra mas lugá

pa boso haña sla,

ku boso ta sigui rebeldiá?

Ya kabes ta tur na herida,

kurason tur debilitá.

6Di plant'i pia te punt'i kabes

no tin niun parti no kubrí

ku herida, sla i yaga,

sin man pa limpia ni mara nan,

ni fria nan doló ku salfi.

7Boso pais ta desolá,

boso siudatnan kandela a devorá,

boso kunukunan ta kuminda pa strañero,

ku a pluma nan laga blo bashí,

anto den boso kara:

kompletamente desolá nan ta,

poné aríbabou pa man strañero.

8Herusalèm, e kapital, a keda

manera parapete bandoná den kunuku di wendrùif,

so manera bohio den plantashon di kònkòmber,

manera siudat rondoná di enemigu.

9Si SEÑOR, Dios Soberano, no a laga algun di nos sobrebibí,

nos lo a disparsé manera Sódoma i Gomora,

siudatnan di maldat.

Hustisia ta mihó ku sakrifisio

10Boso, gobernantenan di Herusalèm,

korumpí manera esnan di Sódoma,

harto perverso manera di Gomora,

tende palabra di SEÑOR,

skucha ku atenshon

loke nos Dios ta siña boso.

11SEÑOR ta bisa:

‘Ki bal boso sakrifisionan numeroso?

Mi ta hartá di chubat'i karné kimá pa Mi

i di sebu di boso bisénan gòrdá;

sanger di toro, di lamchi i di chubatu ta repugná Mi.

12Ora di presentá Mi dilanti den tèmpel,

na trupa ta kana pasa riba mi plenchinan.

T'esei Mi a pidi boso antó?

13No trese boso ofrendanan bashí mas,

boso sensia ta repugná mi nanishi.

Boso ta selebrá Festival di Luna Nobo,

sabat i otro fiesta,

ma Mi no ta tolerá inhustisia man na man ku fiesta solèm.

14Mi ta odia boso selebrashon di Luna Nobo i boso fiestanan,

nan a para bira un tehi pa Mi,

Mi ta kansá di nan.

15Ora boso hisa man pa resa,

Mi no ta aktu boso.

Ni maske kuantu orashon boso hasi,

Mi no ta skucha boso,

pasobra boso man ta tur na sanger!

16Bai laba boso kurpa hasié limpi,

kita boso maldatnan fo'i mi bista,

stòp di hasi malu!

17Siña hasi bon:

respetá derecho di hende,

pone probechadó hasi loke ta drechi,

duna wérfano su derecho,

sali na defensa di biudanan.’

18SEÑOR ta bisa:

‘Bini, laga nos ban pleita e kaso!

Boso pikánan ta kòrá manera sanger,

pero nan por bira blanku manera lechi;

nan ta kòrá manera kandela,

pero nan por bira blanku manera lana puru.

19Kontal ku boso ta obediente i ta skucha,

boso lo kome tur e mihó frutanan ku boso tera produsí.

20Pero si boso persistí den rebeldia,

spada lo kaba ku boso.’

T'esaki SEÑOR mes a bisa.

Huisio riba Herusalèm

21Kon Herusalèm por a para bira prostituta,

e siudat un ten asina fiel,

kaminda hende tabata respetá derecho di otro

i hustisia a forma su bibá!

Awor ta asesino ta manda!

22Herusalèm, bo tabata plata puru,

awor b'a keda kachikachi;

bo tabata bon biña,

awor b'a bira lalilali.

23Bo gobernantenan ta rebelde,

kompinchi di ladron.

Tur gusta pa hende susha nan man

i ta ansioso pa tuma sèn bou 'i mesa.

Nan no ta trata wérfano ku hustisia

i keho di biuda no ta importá nan.

24P'esei Dios, SEÑOR soberano,

Dios fuerte di Israel, ta bisa:

‘Ai di boso,

Mi ta bai regla kuenta ku mi atversarionan

i Mi ta tuma vengansa riba mi enemigunan.

25Mi ta bai hisa man kontra bo, Herusalèm;

Mi ta purga bo kachikachi manera den ásido

i Mi ta kita tur e partinan impuru.

26Lo Mi hasi bo huesnan manera ántes,

bo konseheronan manera den prinsipio.

E ora ei lo yama bo:

Siudat Hustu, Sitadel Fiel.

27Ta rèspèt pa derecho so por salba Sion,

praktiká hustisia so por salba esnan ku tin duele.

28Ma lo Mi plèchè e pekadónan i e rebeldenan pareu,

esnan ku bandoná SEÑOR lo peresé.

29Bini huntu bou di palunan di ekel,

hasi sakrifisio den hardinnan sagrado,

esei ta boso bida largu,

t'esei boso gusta.

Esta bèrgwensa!

30Pasobra boso lo bira manera e palunan di ekel ei,

ora nan pèrdè nan blachi,

manera e hardinnan,

ora nan no haña awa.

31Hòmber fuerte lo bira manera west

i su obra manera un chispa,

nan dos ta sende pareu

i no tin hende pa paga e kandela.’