Salmo 14 - Papiamentu Bible 2013(PB13)

SALMO 14Maldat i korupshon ta reina tur kaminda(Salmo 53)Pa maestro di kanto. Di David.

1Hende bobo ta bisa den nan mes:

‘Ai nò, no tin Dios!’

Kos malu i horibel nan ta hasi,

ningun no ta hasi bon.

2SEÑOR ta mira abou for di shelu

riba yunan di hende,

pa weta si tin ún ku ta sensato

i ku ta buska Dios.

3Pero tur a kohe mal kaminda,

tur a daña pareu.

Nò, no tin ningun ku ta hasi bon,

ni sikiera ún!

4Ma nan no sa nada antó,

tur e malechornan,

ku ta kome mi pueblo bibu,

komo si fuera ta pan

i ku nunka no ta resa na SEÑOR?

5Te ora ku nan spanta di miedu

pasobra Dios ta ku su fielnan.

6Boso ke bruha propósito di un pober,

ma SEÑOR ta su refugio!

7O, mare salbashon di Israel

por bini for di Sion!

Ora SEÑOR kambia suerte di su pueblo,

pueblo di Yakob lo keda kontentu,

Israel lo ta di fiesta.