Nehemías 6 - Papiamentu Bible 2013(PB13)

Kòmplòt kontra Nehemías

1Sanbalat, Tobias, e arabir Guèshèm i sobrá di nos enemigunan a tende ku mi a rekonstruí e muraya sin laga ningun buraku den dje. Na e momento ei mi no a laga hinka porta ainda den entradanan di siudat.

2E ora ei Sanbalat i Guèshèm a manda rospondi pa mi pa topa ku nan na Kefirim, den vaye di Ono. Pero ta intenshon di hasi mi daño nan tabatin.

3Mi a manda mensahero serka nan ku e kontesta: ‘Mi ta okupá ku un trabou grandi, mi no por bini. Pakiko e trabou mester para djis pasobra mi ta interumpié pa bini serka boso?’

4Kuater bia nan a manda mesun rospondi pa mi, pero kada be mi kontesta tabata meskos.

5E di sinku bia ku Sanbalat a manda e rospondi akí pa mi, su sirbidó tabatin un karta habrí den su man.

6Den e karta tabatin skibí asin'akí: ‘Ta kore rumor bou di e pueblonan ku no ta hudiu i Guèshèm ta konfirmá esaki, ku abo i e hudiunan tin intenshon di rebeldiá; ta p'esei bo ta rekonstruí e muraya. Segun e rumor ei, bo ke bira nan rei.

7Asta bo a nombra profeta pa proklamá tokante di bo na Herusalèm: “Huda tin un rei atrobe!” Tende, e kosnan akí lo yega na orea di rei Artaxèrxès; asina ta, laga nos deliberá riba e asuntu akí.’

8Pero mi a manda e kontesta akí p'e: ‘No tin tal kos, ta abo mes a inventá e asuntu ei.’

9Nan tur tabata trata di hinka miedu den nos kurpa, komo nan tabata pensa ku esaki lo desanimá nos i nos lo stòp ku e trabou. ‘SEÑOR, yuda mi, duna mi mannan forsa!’

10Un dia mi a bai kas di Shemaías, yu di Delaías i ñetu di Mehetabel, pasobra el a hañ'é strobá pa bini serka mi. El a bisa mi: ‘Laga nos ban kas di Dios, paden di tèmpel, i sera e portanan pasobra nan ta bin mata bo, sí, awe nochi mes nan ta bin mata bo.’

11Pero mi a bisa: ‘Ki mishi un hende manera ami hui? Kon mi por riska bai den tèmpel? Un maldat asina lo kosta mi mi bida. Ai nò, mi n' ta bai no.’

12Pasobra mi a ripará bon kla ku no ta Dios a mand'é, pero ku el a pronostiká esei di mi, komo Tobias i Sanbalat a soborn'é.

13Nan a pag'é pa hinka miedu den mi. Nan tabata ke pa mi sigui e konseho akí i asina lo mi a hasi piká. Esei lo a duna nan motibu pa kana papia malu di mi i susha mi nòmber.

14Mi Dios, kòrda kiko Sanbalat i Tobias a hasi; kòrda tambe loke e señora profeta Noadya a hasi i e otro profetanan ku a trata na hinka sustu den mi.

Nan ta kaba e muraya

15Despues di sinkuentidos dia e muraya a keda kla dia bintisinku di luna di Elul.

16Ora tur nos enemigunan, e pueblonan rondó di nos, a tende esei, nan a haña miedu. Tabata un sla duru pa nan orguyo. Nan mester a rekonosé ku a hasi e trabou akí ku yudansa di nos Dios.

17Den e dianan ei tabatin hopi korespondensia entre Tobias i e siudadanonan prominente di Huda.

18Esaki pasobra hopi hende di Huda tabata kompinchi di Tobias. Nan a hura di keda fiel n'e, komo e tabata suegu di Shekanías, yu di Arag, i komo su yu Yohanan a kasa ku yu muhé di Meshulam, yu di Bèrèkías.

19Nan a yega asta dje leu ei ku nan tabata gaba su méritonan den mi presensia i tabata sòru pa e haña sa kon mi a reakshoná. Tobias di su banda tabata manda karta pa hinka sustu den mi.