1Mi ke alabá Bo, SEÑOR, di henter mi kurason,
mi ke konta di tur obra milagroso ku Bo a hasi,
2keda kontentu pa bo via i grita di legria,
mi ke kanta gloria di bo nòmber, Dios Altísimo.
3Pasobra mi enemigunan a hala atras,
nan a kai i peresé dilanti di bo bista.
4Bo a dikta sentensia tur na mi fabor
manera hues hustu, sintá riba bo trono.
5Bo a skual paganonan i kaba ku malbadonan,
laga nan nòmber kai den olvido pa semper.
6A kaba ku e enemigu, ruiná kompletamente!
No ta menta ni nòmber dje siudatnan ku B'a tumba!
7Ma SEÑOR ta sintá riba su trono pa semper,
E tin tribunal prepará pa saka huisio:
8sí, E ta husga mundu ku hustisia,
un sentensia hustu E ta dikta riba pueblonan.
9P'esei SEÑOR ta un fòrti pa hende oprimí,
un fortalesa den tempu di tribulashon.
10Esnan ku sa bo nòmber ta konfia den Bo,
nunka Bo no sa bandoná, SEÑOR, esun ku buska Bo.
11Kanta salmo pa SEÑOR ku ta biba na Sion,
proklamá bou di pueblonan su obranan grandi.
12Dios ku ta venga sanger inosente, E ta kòrda —
E no ta lubidá gritamentu di pobernan.
13P'esei, SEÑOR, tene piedat di mi,
mira kon esnan ku ta odia mi ta flihi mi.
Hiba mi leu for di boka di reino di morto,
14pa mi por alabá tur bo obranan glorioso
i grita di legria meimei di Sion
pa motibu ku Abo a trese salbashon.
15Paganonan a hoga den e pos ku nan a koba,
nan pia a pega den trampa ku nan mes a pone.
16SEÑOR a lusi! El a hasi hustisia!
Mal hende a bruha den reda di nan mes mal akshon.
17Mare hende sin Dios por bai reino di morto,
tur e nashonnan ku no ke kòrda riba Dios.
18Ma E no ta lubidá riba pobernan pa semper,
ilushon di un mizerabel no ta muri bai lag'é.
19Lanta, SEÑOR! No laga hende triunfá:
laga nashonnan pagano keda husgá Bo dilanti.
20Yena nan ku sustu, SEÑOR,
pa e paganonan sa ku ta hende nan ta.
Who We AreWhat We EelieveWhat We Do
2025 by iamachristian.org,Inc All rights reserved.
