Job 32 - Papiamentu Bible 2013(PB13)

1Awor e tres hòmbernan a stòp di diskutí ku Job, pasobra Job a keda insistí ku e tabata inosente.

2Pero Elihu, yu di Barakel di Buz, di famia di Ram, a rabia mashá pisá ku Job, pasobra Job tabata pensa ku e ta den su derecho dilanti di Dios.

3E tabata rabiá tambe ku e tres amigunan di Job, pasobra nan no a logra refutá Job su defensa i sinembargo nan a konden'é.

4Te na e momento ei Elihu no a papia niun palabra ku Job, pasobra e amigunan tabata mas bieu kuné.

5Pero ora el a mira ku e tres hòmbernan no por a rospondé nada mas, el a bira furioso.

Elihu ta haña ku e tin derecho di papia

6P'esei el a bisa:

‘Ami ta hóben ainda

i boso ta hende di edat mas avansá,

p'esei mi tabatin miedu

i no a tribi bisa boso loke mi sa.

7Mi a pensa den mi mes:

“Behes mester opiná;

edat avansá mester instruí kiko ta sabiduria.”

8Pero ta spiritu den hende,

rosea di Todopoderoso,

t'esei ta duna hende poder pa diserní.

9Sabiduria i rekonosementu di loke ta hustu,

no ta dependé ni di edat ni di eksperensia.

10P'esei mi ta bisa:

“Skucha mi i tende loke mi sa.”

Elihu ta akusá e amigunan di a faya den nan kontesta na Job

11Wak, mi a warda miéntras boso tabata papia;

mi a sinta skucha boso rasoná.

Miéntras boso tabata trese boso argumentonan dilanti,

12mi kompleto atenshon tabata pa boso.

Pero niun di boso no por a refutá

Job su palabranan;

niun di boso no a kontestá su argumentonan.

13Boso no por bini mi ku e kuenta:

“Nos a haña sabiduria kaba,

laga Dios i no hende kontradesié.”

14Argumentonan di Job a sera boso boka,

no di mi,

ami lo no rospond'é,

usando boso argumentonan.

Elihu ta mustra ku e tin ku papia sino e ta rementá

15Job, bo tres amigunan!

Ai, kampana a guli lenga!

Palabra a kaba laga nan!

16Mi mester para warda,

miéntras nan ta keda ketu,

sin palabra sali fo'i nan boka?

17Mi tambe ke dòsplaka di palabra;

mi tambe ke bisa loke mi sa,

18pasobra mi kana ta yen,

palabra ta choka mi!

19Mira, mi paden ta manera saku nobo

yená ku biña ku ta fermentá;

kla pa rementá!

20Mi mester papia pa haña alivio;

mi mester habri mi boka, rospondé.

21Mi no ta tuma parti pa niun hende,

ni mi no ta trastia niun hende,

22pasobra trasteria no ta den mi.

Si esei tabata e kaso,

antó mi Kreador lo a kaba ku mi mesora.