Éksodo 30 - Papiamentu Bible 2013(PB13)

E altá pa ofresé sensia(Éksodo 37:25-28)

1Traha un altá di palu di akasia pa kima sensia ariba.

2E mester ta firkant: 50 sèntimeter largu i 50 sèntimeter hanchu. E mester ta un meter altu. E kachunan mester ta tur na un ku e altá.

3Fura e blat ariba, e bandanan i e kachunan ku oro puru i traha un leshi di oro rònt di dje.

4Pega na kada banda di e altá, bou di e leshi, dos renchi di oro. E renchinan ta pa pasa e baranan ora ta karga e altá.

5Traha e baranan di palu di akasia i fura nan ku oro.

6Pone e altá dilanti di e kortina tras di kual e arka ku dokumento di aliansa ta. Einan kaminda e arka ta, lo Mi topa ku bo.

7Tur mainta ora Aaron ta prepará e lampinan, e mester kima riba e altá sensia ku ta manda holó dushi;

8tambe ora nochi ta bai sera i e sende e lampinan. Ta un obligashon ku ta konta pa tur dia, pa tur generashon benidero.

9Riba e altá ei no mag kima ningun otro sorto di sensia, ni sakrifisio di kandela, ni ofrenda vegetal, ni basha biña riba dje komo ofrenda.

10Un be pa aña Aaron mester hunta sanger di e sakrifisio pa pordon di piká na e kachunan di e altá akí pa drecha tur kos atrobe entre boso ku Mi. Tur generashon mester hasié, kada aña di nobo. Pa Mi e altá ta algu mashá sagrado.’

Donashon obligatorio ora ke sa kuantu hòmber israelita tin

11SEÑOR a bisa Moises:

12‘Ora boso tene un senso pa sa kuantu hòmber israelita tin, kada un di nan mester duna Mi un suma pa salba su bida, ya e senso no ta bira fatal pa nan.

13Tur hende ku keda registrá mester duna un moneda di plata di sinku gram.