1 Krónikanan 12 - Papiamentu Bible 2013(PB13)

Promé siguidónan di David

1Ya for di tempu ku Saul, yu di Kish, a kore ku David for di korte, hopi hende a djòin David na Siklag. Nan tabata hòmber balente ku tabata yuda David den bataya.

2Nan tabata armá ku slengu, flecha i bog i nan por a tira piedra i flecha tantu ku man drechi komo ku man robes. Di tribu di Benhamin, ku Saul tambe tabata pertenesé n'e, a djòin e:

3Lider Ahiezèr i Yoash, yu hòmbernan di Shemaa di Guibea;

Yeziel i Pèlèt, yu hòmbernan di Azmawèt;

Beraka i Yehu for di Anatot;

4Yishmaías di Guibeon, un di e trinta hòmbernan balente, ku despues a bira nan lider;

Yirmeya, Yahaziel, Yohanan i Yozabad di Guedera;

5Eluzai, Yerimot, Bealías, Shemarías i Shefatías di Harif;

6Elkana, Yishías, Azarel, Yoezer i Yashobeam, tur di Korag;

7Yoela i Zebadías, yu hòmbernan di Yeroham di Guedor.

8Di tribu di Gad tambe algun hòmber balente, sòldánan eksperensiá, armá ku eskudo i lansa, a djòin David, tempu e tabata den spelònk den desierto di Huda. Nan tabata parse leon i tabata lihé manera biná.

9Nan tabata diesun: Ezèr ku tabata e lider, siguí pa Obadías, Eliab,

10Mishmana, Yirmeya,

11Atai, Eliel,

12Yohanan, Elzabad,

13Yirmeya i Makbanai.

14E hòmbernan akí di tribu di Gad tabata òfisir di ehérsito. Esun mas suak por a bringa kontra shen hòmber i esun mas fuerte kontra mil.

15Ta nan a riska krusa Yordan den luna di mart, ora e riu a subi tera i sera kaminda den e vayenan tantu parti ost komo parti wèst.

16Di tribu di Benhamin i di Huda tambe algun hòmber balente a bai na e spelònk den seru kaminda David a skonde.

17David a kana bin kontra nan i a bisa nan: ‘Si boso a bini na pas pa yuda mi, boso ta bonbiní. Pero si boso tin intenshon di traishoná mi i entregá mi na mi enemigunan, ounke mi no a kometé ningun inhustisia, Dios di nos antepasadonan lo weta i kastigá boso!’

18E ora ei Spiritu di SEÑOR a poderá di Amasai, lider di e trinta balentenan, i el a grita:

‘Nos ta ku bo David!

Nos ta na bo banda, yu di Ishai!

Nos ta deseá bo pas i tur kos bon!

Pas sea ku bo i ku esnan ku yuda bo,

pasobra bo Dios ta yuda bo!’

E ora ei David a aseptá nan i a hasi nan òfisir di su trupa.

19Di tribu di Manase tambe algun hòmber balente a djòin David. Esaki a sosodé tempu el a djòin e filisteonan, ounke realmente David no a yuda nan ku nada, pasobra e hefenan di stat di e filisteonan a kore kuné deliberadamente. Nan a pensa ku lo por kosta nan nan kabes, si e kambia di idea i bai na fabor di su shon Saul.

20Pa e motibu ei David a bolbe bai Siklag. E siguiente hòmbernan di tribu di Manase a skohe su banda: Adnag, Yozabad, Yediael, Mikael, Yozabad, Elihu i Siltai; ántes nan tabata lider di mil sòldá di e tribu di Manase.

21Esakinan a yuda David kontra e trupanan di bandidu amalekita pasobra tur tabata sòldá balente. Nan a bira òfisir di su trupanan.

22Tur dia tabata bini mas hende aserka pa yuda David te dia e tabatin un ehérsito inmensamente grandi.

Ehérsito di David na Hebron

23Aki ta sigui e kantidat di hòmber bon itrein pa bataya, ku a bini Hebron serka David, pa proklamá David rei na lugá di Saul, segun palabra di SEÑOR.

24Di tribu di Huda: 6800 sòldá bon itrein, armá ku eskudo i lansa.

25Di Simeon: 7100 sòldá balente.

26Di Levi: 4600;

27entre nan Yehóyada, kabes di tribu di e desendientenan di Aaron ku 3700 siguidó i

28Sadok, un sòldá hóben, pero balente, ku bintidos miembro di su famia. Tur tabata lider.

29Di Benhamin, di e mesun tribu ku Saul, 3000 hòmber so, ya ku mayoria di e miembronan di tribu di Benhamin a keda fiel na famia di Saul.

30Di Efraim: 20.800 sòldá itrein; nan tabata hòmber importante den nan tribu.

31Di mitar tribu di Manase 18.000 hende, nombrá spesialmente pa hasi David rei.

32Di Isakar: 200 kabes di tribu ku e miembronan ku tabata bou di nan mando. E hendenan akí por a pronostiká si tempu tabata faborabel òf nò i asina disidí kiko Israel mester a hasi.

33Di Zebulon: 50.000 sòldá kla pa bataya, ku tur sorto di arma, i e desishon firme pa yuda David.

34Di Naftali: 1000 lider, ku 37.000 sòldá, armá ku eskudo i lansa.

35Di Dan: 28.600 sòldá kla pa bataya.

36Di Asher: 40.000 sòldá kla pa bataya, ku nan por yama pa bai guera un ora pa otro.

37Di e otro banda di Yordan, di tribu di Ruben, Gad i e mitar tribu di Manase: 120.000 sòldá. Nan tabatin tur sorto di arma.

38Tur e sòldánan akí a marcha huntu den rei bini Hebron, determiná pa hasi David rei di henter Israel. E israelitanan ku no tabata presente tambe tabata di mesun opinion, esta ku David mester a bira rei.

39E sòldánan a keda tres dia serka David. Nan rumannan di tribu di Huda a perkurá pa kuminda i bibida.

40Hendenan di den bisindario, asta te Isakar, Zebulon i Naftali, a kontribuí. Riba buriku, kamel, mula i baka nan a trese hariña, bola di figo, bola di rasenchi, biña i zeta. Tambe nan a trese baka, kabritu i karné na gran kantidat, pasobra tabata reina alegria na Israel.