Amos 3 - Papiamentu Bible 2013(PB13)

Dios ta kastigá su mes pueblo

1Israelitanan, SEÑOR a reskatá boso for di Egipto, henter boso pueblo; p'esei skucha loke E ke bisa boso.

2‘Den tur nashon na mundu

ta boso so Mi a skohe

i pega na mi kurason.

P'esei ta boso lo Mi pidi kuenta i rason

di boso mal akshonnan.’

Tarea di e profeta

3Dos hòmber ta biaha huntu

si nan no a palabrá di antemano pa topa otro?

4Un leon ta grita den mondi

si e no a gara un víktima?

Leon yòn ta gruña den su kueba

si e no a logra yag algu?

5Un para ta baha drenta un kui

si no tin maishi aden?

Un trampa ta dal sera

si nada no a kai aden?

6Tròmpèt di guera ta zona den siudat

sin spanta e hendenan?

Desaster ta baha riba un siudat

si no ta SEÑOR a mand'é?

7Nò!

Asina SEÑOR Dios no ta hasi nada tampoko

sin revelá su sirbidónan, e profetanan, su plan.

8E leon a grita!

Ken no ta sinti miedu?

SEÑOR Dios a papia!

Ken por keda sin proklamá su mensahe?SEÑOR ta manda destrukshon pa Samaria

9SEÑOR a bisa mi:

‘Anunsiá e hendenan ku ta biba den e palasionan

di siudat Ashdod i di Egipto,

e siguiente mensahe:

“Bini huntu riba e serunan rondó di Samaria.

Mira kon teror ta reina den siudat,

kon hende ta oprimí hende.” ’

10SEÑOR ta bisa:

‘Nan ta trapa derecho di hende ku pia.

Nan ta stiwa nan mansionnan

ku tur loke violensia i ladronisia ta duna nan.

11P'esei Ami, SEÑOR Dios, ta anunsiá

e hendenan di Samaria lo siguiente:

Un enemigu lo rondoná boso pais,

basha boso fòrtinan abou

i hòrta tur loke tin den boso mansionnan.’

12Asina SEÑOR ta bisa:

‘Di e israelitanan bibá na Samaria

lo no sobra nada mas

ku loke un wardadó di karné

logra saka for di den boka di leon:

dos pida wes'i pata o un punta di orea.

Na Samaria lo sobra solamente

pida kabes di kama

o un pia di e sofá,

ku awe ainda nan ta rèk nan kurpa ariba.

13Skucha i atvertí e desendientenan di Yakob:

Ami, SEÑOR Dios Soberano, ta bisa:

14Riba e dia

ku Mi kastigá Israel pa su krímennan,

Mi ta destruí altánan na siudat Betel tambe;

kachunan di altá lo kibra

i kai abou na suela.

15Si hende tin un kas den siudat

i otro den kunuku lo Mi destruí tur dos;

lo Mi kaba ku e kasnan dòrná ku ivor

i destruí e mansionnan.’

T'esaki SEÑOR a anunsiá.