Mikéas 5 - Papiamentu Bible 2013(PB13)

1Herusalèm, abo ku ta gusta ataká

hende pober den nan propio seno,

ora bo prepará pa ataká,

e enemigu lo lanta un muraya di sitia kontra nos

i bin hèfta gobernante di Israel

un bòftá ku kant'i man.

2Pero abo, Betlehèm na Efrata,

ounke bo ta un di e siudatnan insignifikante di Huda,

for di bo lo sali unu,

ku lo goberná Israel den mi nòmber.

Lo por trasa su orígen te den eternidat.

3Ta bèrdat ku SEÑOR ta laga su pueblo desampará,

pero ta te dia esun na estado

kaba di haña su yu.

E ora ei e israelitanan lo reuní

ku sobrá di nan rumannan.

4E ora ei esun ku tin ku goberná

lo lanta pa guia i kuida su pueblo,

ku forsa ku Dios lo dun'é;

lo e demostrá gloria di SEÑOR, su Dios.

Su pueblo lo biba trankil,

pasobra henter mundu lo rekonosé su grandesa.

5Esaki yama pas!

Atversarionan

Si asirionan mester invadí nos pais

i penetrá den nos mansionnan,

nos lo mobilisá tur nos defensa- i nos hefenan;

esei lo ta mas ku sufisiente.

6Nan lo goberná e pais Asiria ku spada

i e pais Nimrod ku sabel saká fo'i baliña.

Nos rei lo libra nos dje enemigu

ora ku e invadí nos pais

i penetrá den nos teritorio.

7Desendensia di Yakob, rondoná di nashonnan poderoso,

lo ta manera freskura di serena,

ku SEÑOR ta manda,

refreskante manera yobida riba yerba,

sin ku nan tin ku dependé di hende mortal.

8Nò, desendensia di Yakob lo rebeldiá,

bai kontra tur otro pueblo.

Lo e ta meimei dje nashonnan mes poderoso

ku leon meimei di bestia feros,

ku leon yòn meimei di trupa di karné;

unda k'e yega e ta ataká i habraká.

No tin skapatorio!

9Israel, laga bo man ta fuerte kontra bo enemigunan

i laga bo kontrinkantenan keda likidá!

Mikéas

10T'esaki SEÑOR ta bisa ku E ta bai hasi

riba e dia ei:

‘Mi ta mata tur bo kabainan,

Mi ta destruí tur bo garoshinan di guera,

11Mi ta kaba ku bo siudatnan,

Mi ta basha tur bo fòrtinan abou.

12Mi ta pone un fin na bo bruherianan,

bo miramentu di destino ta kaba.

13Mi ta kibra bo diosnan falsu

i e piedranan santu ku bo tin, na pida pida.

E ora ei bo no por bùig na suela pa adorá

trabou di bo propio man.

14Mi ta ranka bo palunan sagrado fo'i suela

i destruí e lugánan sagrado.

15E ora ei numa,

Mi ta tuma vengansa riba e pueblonan,

ku furia ardiente,

pasobra nan no a obedesé Mi.’