1 Reinan 11 - Papiamentu Bible 2013(PB13)

Salomon ta adorá diosnan falsu

1Fuera di e yu muhé di Fárao, Salomon a stima hopi muhé strañero. Edom, Yoab, e komandante di ehérsito, a bai dera esnan ku a kai den bataya i el a mata tur e hòmbernan di Edom.

16E i tur e israelitanan a keda aya durante seis luna, te ora nan a kaba ku tur e hòmbernan di Edom.

17Pero Hadad, ku tabata hopi yòn e tempu ei, a hui bai Egipto ku poko hòmber di Edom, ku tabata den servisio di su tata.

18Nan a sali di Midian bai Paran, kaminda nan a buska poko hòmber mas pa bai serka Fárao, rei di Egipto. Fárao a duna Hadad un kas, primintié kuminda i a regal'é un pida tera.

19Hadad a gana simpatia di Fárao asina tantu, ku Fárao a lag'é kasa ku su kuñá, ruman muhé di reina Tagpenes.

20E ruman muhé di Tagpenes a haña un yu hòmber ku Hadad. Nan a yama e yu Guenubat. Tagpenes a kria e yu akí den palasio di Fárao, kaminda e mucha a lanta huntu ku e yunan di Fárao.

21Ora Hadad ku tabata na Egipto, a tende ku David a muri i ku Yoab, e komandante di ehérsito, tambe a muri, el a bisa Fárao: ‘Laga mi bai mi tera.’

22Pero Fárao a puntr'é: ‘Pakiko bo ke bai bo tera diripiente asina? Bo ta sinti falta di algu aki?’ Hadad a kontestá: ‘Mi no ta sinti falta di nada, pero laga mi bai tòg!’

23Dios a laga un enemigu mas lanta kontra Salomon, esta Rezon, yu di Elyada ku a hui bai for di su doño Hadadezèr, rei di Soba.

24El a reuní poko hòmber i a bira kabesante di un trupa di rebelde; dia David tabata buska nan pa mata, nan a bai biba na Damasko i a hasi Rezon rei.

25Asina Rezon a bira rei di Aram. E tabata enemigu di Israel durante henter bida di Salomon i meskos ku Hadad e tambe a kousa daño na Israel.

26Yerobeam, yu di Nebat, tambe a lanta kontra rei. Yerobeam tabata un funshonario di Salomon di e siudat Sereda, di tribu di Efraim. Su mama Serua tabata biuda.

27E motibu ku Yerobeam a lanta kontra rei ta lo siguiente: Salomon a kaba di traha e terasa di Milo pa sera e buraku den muraya di e siudat di su tata David.

28Yerobeam tabata un hòmber balente i fuerte i ora Salomon a mira ku e hóben tabata un bon trahadó, el a hasié forman di tur e peonnan di e tribu di Jozef.

29Un dia ku Yerobeam a sali for di Herusalèm, el a topa profeta Ahías di Silo na kaminda. Ahías tabatin un mantel nobo bistí.

30Nan dos so tabata den kunuku. Na dado momento Ahías a kohe e mantel nobo, ku e tabatin bistí, sker e den diesdos pida.

31El a bisa Yerobeam: ‘Tuma dies pida pa bo, pasobra SEÑOR, Dios di Israel, ta bisa: “Mira, Mi ta bai ranka kita e reino for di Salomon i duna bo dies tribu.

32Lo Mi laga Salomon ku un tribu so, pa kara di mi sirbidó David i pa motibu di Herusalèm, e siudat ku Mi a skohe den tur e tribunan di Israel.

33Pasobra rei i pueblo a bira lomba pa Mi i a bai adorá diosnan falsu manera Astarte, diosa di Sidon, Kemosh, dios di Moab, i Milkom, dios di Amon. Nan no a sigui mi kamindanan. Nan no a hasi loke ta drechi den mi bista, ni a kumpli ku mi leinan i mi dekretonan manera su tata David, a hasi.

34Sinembargo lo Mi no kita e reino for di dje mes; lo Mi manten'é komo rei tanten e ta na bida, pa kara di mi sirbidó David, ku Mi a skohe i ku a kumpli ku mi mandamentunan i mi leinan.

35Pero lo Mi kita e reino for di su yu i duna abo e, es desir lo mi duna bo dies tribu.

36Lo Mi laga su yu keda ku ún tribu, pasobra Mi ke tene rekuerdo di mi sirbidó David semper bibu na Herusalèm, e siudat ku Mi a skohe komo mi santuario.

37Bo mes, lo Mi hasi rei di Israel i lo bo goberná unda ku bo ke.

38Si bo obedesé Mi i hasi tur loke Mi ordená bo, bo sigui e kaminda ku lo Mi mustra bo i bo hasi loke ta drechi den mi bista, bo kumpli ku mi leinan i mi mandamentunan manera David, mi sirbidó, a hasi, lo Mi keda ku bo. Lo Mi duna bo un dinastia duradero, manera Mi a duna David, i entregá Israel na bo.

39Pa e motibu akí lo Mi tin ku humiliá e desendientenan di David, pero no pa semper.” ’

40Salomon a trata na mata Yerobeam, pero Yerobeam a hui bai Egipto, serka Shishak, rei di e pais ei, i el a keda aya te ora Salomon a muri.

Morto di Salomon(2 Krónikanan 9:29-31)

41Mas detaye tokante Salomon, su sabiduria i tur loke el a hasi ta skibí den buki di krónika di Salomon.

42For di Herusalèm, Salomon a goberná henter Israel durante kuarenta aña.

43Dia Salomon a bai sosegá serka su antepasadonan, a der'é na siudat di su tata David. Su yu Rehabeam a siguié komo rei.