Amos 4 - Papiamentu Bible 2013(PB13)

1Damanan, ku na Samaria ta hiba un bida dushi,

manera bakanan gordo di Bashan,

skucha loke mi ta bai bisa boso,

boso ku ta maltratá hende pober

i oprimí esnan ku no tin moda di biba

i ta bisa boso señor esposo:

‘Trese biña pa nos bebe.’

2SEÑOR Dios a hura pa su santu nòmber:

‘E dia lo yega sigur

ku e enemigu lo gancha boso tur

sin eksepshon

manera ta pega piská na liña.

3Lo e lastra kada un di boso

i pasa boso derechitu

dor di e buraku mas serka den muraya

i benta boso den direkshon

di seru di Hermon.’

T'esaki SEÑOR a anunsiá.

Israel no a siña nada: e no a bolbe serka Dios

4SEÑOR Dios ta bisa:

‘Bini Betel numa, e lugá sagrado,

i lanta kontra Mi,

bai e santuario di Guilgal

i lanta kontra Mi ku tur ku tin,

si t'esei ta boso antoho.

Ai sí,

trese boso bestianan mainta numa komo sakrifisio

i bini su manisé ku e désimo parti di kosecha.

5Ofresé boso pan pa gradisí SEÑOR,

bati basia, bende grandi

ku boso sakrifisionan boluntario.

N' t'esei boso ta gusta, israelitanan?’

6SEÑOR Dios, ta bisa:

‘T'Ami a laga boso stoma bashí,

ni den boso siudatnan ni pueblonan no tabatin kuminda.

Tòg boso no a bolbe serka Mi.

7Mi a wanta áwaseru

tres luna promé ku kosecha,

ora tabatin mas mester di dje.

Mi a laga awa yobe

den un siudat sí,

den otro no;

un kunuku sí a haña áwaseru,

otro no

i el a seka.

8Hende di tur kaminda tabata lastra bai e siudat,

ku tabatin awa ainda,

pero e awa no tabata yega pa asina tantu hende.

Tòg boso no a bolbe serka Mi.

9Mi a laga boso kosecha pashimá i kria pispis;

Mi a laga boso hòfi- i kunukunan di wendrùif seka;

dalakochi a kome boso palunan di figo i di oleifi

laga nan blo bashí.

Tòg boso no a bolbe serka Mi.

10Mi a manda pèster riba boso,

manera riba Egipto.

Mi a laga boso hóbennan muri den bataya

i Mi a entregá e enemigu boso kabainan komo botin.

Mi a laga mal holó

di e kadavernan den boso kampamentu

penetrá den boso nanishi.

Tòg boso no a bolbe serka Mi.

11Mi a destruí boso pais,

manera Mi a hasi ku Sódoma i Gomora.

Ta algun hende so a sali bibu,

manera pida palu ku b'a logra saka fo'i kandela.

Tòg boso no a bolbe serka Mi.’

T'esaki SEÑOR a bisa.

12‘P'esei, pueblo di Israel,

wak kon Mi ta bai trata boso.

I unabes boso sa kiko ta warda boso,

prepará boso pa enfrentá Mi, boso Dios,

ku ta bai husga boso.’

13Sí,

Esun ku a forma serunan

i a krea bientu,

Esun ku ta revelá hende

su pensamentu,

ku ta kambia klaridat pa skuridat

i ta move riba kabes di serunan,

SEÑOR Dios Soberano su nòmber ta.