1 Pedro 2 - Papiamentu Bible 2013(PB13)

E piedra bibu i e nashon santu

1P'esei anto pone un banda tur sorto di maldat i engaño, hipokresia, envidia i tur sorto di papiamentu negativo.

2Deseá fervorosamente di bebe manera yu resien nasí e lechi spiritual ku ta puru, pa boso krese i yega na salbashon,

3ya ku boso a eksperensiá kaba kon bon Señor ta.

4Bini serka djE. E ta e piedra bibu ku hende a rechasá, pero ku Dios a skohe komo piedra balioso.

5Asina Dios lo usa boso manera piedra bibu den konstrukshon di e kas spiritual i boso lo ta saserdote santu ku ta ofresé sakrifisio spiritual ku ta agradá Dios pa medio di Hesu-Kristu.

6Pasobra tin pará den Skritura:

‘Mira, Mi ta bai pone un piedra

ku ta esun prinsipal riba Sion;

ta un piedra skohí i balioso.

Anto esun ku kere den djE

lo no keda bergonsá.’

7P'esei e piedra akí ta di gran balor pa esnan ku ta kere, pero pa boso ku no ta kere e siguiente troso ta konta:

‘E piedra ku e trahadónan a rechasá

t'é a bira piedra prinsipal.’

8I tambe:

‘E piedra akí ta un piedra ku nan ta dal nan pia n'e

i e ta un barank'i piedra ku ta pone nan trompeká.’

Nan ta trompeká, pasobra nan no ta obedesé palabra di Dios. T'asina Dios a destiná pa nan.

9Pero boso ta un pueblo skohí, saserdote real, un nashon konsagrá na Dios,Biba manera sirbidó di Dios

11Rumannan stimá, mi ke hasi e siguiente apelashon na boso ku ta strañero i bishitante den e mundu akí: No entregá boso na pashon baho ku semper ta na guera ku hende su alma.Salmo 119:19

12Sòru di komportá boso mes bon asina entre e paganonan, pa ora nan akusá boso di ta malechor, nan mira boso bon obranan i glorifiká Dios dia E bini pa husga.

13Pa motibu di Señor someté boso na tur esnan ku tin un puesto di outoridat, sea ta na emperador ku tin e outoridat máksimo

14òf sea na e gobernadornan ku el a nombra pa kastigá e malechornan i pa honra esnan ku hasi bon.

15Pasobra Dios ke pa boso hasi loke ta bon pa asina pone un fin na e papiamentu ignorante di hende bobo.

16Biba manera hende liber, pero no usa boso libertat pa hasi maldat, sinembargo us'é pa biba komo sirbidó di Dios.

17Respetá tur hende, stima e rumannan, mustra reverensia na Dios i honra emperador.

Sufrimentu di Kristu komo ehèmpel

18Boso ku ta sirbidó mester someté boso na boso shonnan i demostrá rèspèt den tur forma, no solamente na esnan ku ta bondadoso i amabel, pero tambe na esnan ku ta mal hende.

19Ta grasia di Dios si un hende soportá doló di sufrimentu inhustu, ya ku e ke ta fiel na Dios.

20Pasobra ta ki honor tin den wanta sla komo kastigu pa algu malu ku boso a hasi? Pero soportá sufrimentu pa algu bon ku boso a hasi, esei ta grasia di Dios.

21Ta pa e motibu ei mes Dios a yama boso, pasobra Kristu a sufri pa boso i a duna boso un ehèmpel pa boso sigui den su pasonan.

22E no a kometé niun piká ni nunka mentira no a sali for di su boka.Isaías 53:9

23Ora nan a insult'É, E no a insultá nan bèk; ora nan a pon'É sufri, E no a menasá nan, sino a entregá su mes den man di Dios ku ta e Hues hustu.Isaías 53:7

24Kristu mes a karga nos pikánan den su kurpa hiba nan na krus pa nos por muri pa piká i biba un bida segun boluntat di Dios. Ta danki na su yaganan ku boso a haña kura.Isaías 53:5

25Boso tabata manera karné ku a kana dualu,Isaías 53:6 pero awor boso a bira bini bèk serka e Wardador i Kuidador di boso alma.