Isaías 64 - Papiamentu Bible 2013(PB13)

1 Ai, mare Bo por a sker shelu habri

i baha bini abou!

Serunan lo a sakudí Bo dilanti.

2Baha bini abou,

manera kandela ku ta sende taki

i pone awa den ketel herebé.

Mustra bo enemigunan ki sorto di Dios Bo ta;

pueblonan lo tembla pa Bo.

3Pasobra tempu Bo tabata hasi kosnan asombroso,

kosnan ku nos no a spera nunka,

B'a baha bini abou

i serunan a sakudí Bo dilanti.

4Pasobra nunka niun hende n' tende un kos asina,

nunka ántes e n' haña sa,

niun wowo hamas no a kontemplá un Dios manera Abo.

Un Dios ku ta hasi tur kos

pa hende ku ta spera riba djE.

5Bo ta sali na yudansa di hende

ku ta hasi kos drechi ku amor,

ku tin nan bista fihá riba Bo,

riba e kaminda ku Abo mustra nan.

Pero Bo tabata furioso ku nos,

pasobra nos no a obedesé Bo;

pa basta tempu nos a keda asina.

Akaso un dia nos lo por logra salbashon?

6Nos tur ta impuru,

inkapas pa sirbi Bo,

nos mihó echonan ta repugnante

manera paña chikí sushá na sanger.

Nos ta kulpabel

i ta kai manera blachi seku,

bientu ta hisa nos bai kuné.

7Niun hende no ta invoká bo Nòmber mas,

no ta tuma un kurashi i dal tene na Bo.

Pasobra Bo no a laga nos mira bo kara mas

i B'a laga nos bira was den poder di nos mal inklinashonnan.

8Sinembargo t'Abo ta nos Tata, SEÑOR.

Nos ta e klei,

Abo Esun ku ta traha kuné;

nos tur ta obra di bo man.

9P'esei no rabia muchu ku nos, SEÑOR,

no keda kòrda nos pikánan pa semper.

Wak nos ku kariño.

N' ta bo pueblo nos tur ta?

10Bo siudatnan santu ta un desierto,

Herusalèm riba seru di Sion

un desierto, un ruina e ta.

11Nos tèmpel santu i glorioso,

kaminda nos antepasadonan tabata honra Bo,

a bira kuminda pa vlamnan.

Tur loke nos tabata stima,

tur kos ta destruí.

12Esei no ta konmové Bo, SEÑOR?

Bo por sigui keda ketu

i laga nos sufri ainda mas?